Impila ti lima a senador ti resolusion a manggutigot ken ni Senador Ronald "Bato" Dela Rosa a boluntario a sumuko ken mangsapul iti legal a pamuspusan nga ipaay ti Konstitusion, ken dadduma pay a paglintegan.
Indatag da Senador “Tito” Sotto III, Panfilo “Ping” Lacson, Risa Hontiveros, Paolo “Bam” Aquino IV, ken Francis “Kiko” Pangilinan ti Senate Resolution (SR) No. 395 idi Mayo 12.
Segun iti SR No. 395, saan a mabalin nga ipaay ti Senado ti makunkuna a “protective custody” wenno pagkamangan ni Dela Rosa.
Impaganetget ti resolusion a nupay adda nakedngan a parliamentary immunity dagiti senador ken kongresman, saan a maipalubos a mangipaay ti Senado iti pagkamangan, kasta met ti pannakailisi (immunity) iti pannakaarestar wenno ti makunkuna a ‘protective custody’ iti asino man a kamengda iti labes ti intuding ti linteg.
Kuna ti resolusion nga awan ti probision iti Konstitusion wenno paglintegan ti Senado a mangipalubos iti Senado a mangipaay iti “institutional refuge” wenno pannakailisi iti nainkalintegan a panangarestar.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Dinakamat ti resolusion ti Republic Act 9851, wenno ti Philippine Act on Crimes Against International Humanitarian Law, Genocide, and Other Crimes Against Humanity, a mangipaay iti hurisdiksion kadagiti nadutokan a korte.
Pinasingkedan ti resolusion ti panagkumit ti Senado iti Konstitusion, ti panagturay ti linteg, ken pannakadusa dagiti nakabasol nga opisial uray ania pay ti pagsaadan wenno posisionda. (Hannah L. Torregoza/Manila Bulletin//Lito Hilidon/Bannawag)
