Awan uray maysa kadagiti soldado a naisaad iti pasdek ti Senado ti nangusar iti ania man nga igam bayat ti napasamak a panagpipinnaltog iti damag a makemmeg ken maipan ni Sen. Ronald “Bato” Dela Rosa iti International Criminal Court (ICC).
Ngem ketdi, dagiti armado a kameng ti Office of Sergeant-At-Arms (OSAA) nga agbambantay iti seguridad iti Senado ken idadauluan ni retired police general Mao Aplasca, ti nagpaputok a makagapu iti panaglagaw dagiti senador, periodista, ken dadduma pay a tattao nga adda iti uneg ti pasdek idi rabii ti Mayo 13.
Segun ken ni Gen. Romeo Brawner, chief of staff ti Armed Forces of the Philippines (AFP), dagiti soldado a Marines a nakita iti ladawan ken video footage a simrek iti pasdek ket paset ti security detail nga ipapaayda kadagiti pasdek ti gobierno, pasilidad, ken dadduma pay a pasdek.
Kinuna ni Brawner a nakasaritana ti ground commander a naisaad iti Senado, a nangipasigurado kenkuana nga awan ti soldado a nagpaputok iti paltogna.
Kinuna ni Brawner nga adda sadiay dagiti Marines tapno mangsuportar, ket ti OSAA ti nagpaputok.
Presidente Marcos, nagpaayab iti special session ti Kongreso inton Hunio 17
Iti sabali a bangir, kinuna ti National Bureau of Investigation (NBI) a saan a dagiti ahenteda ti nagpaputok, ken awan ti imbaonda a tao iti Senado a mangipatungpal iti warrant of arrest ni Dela Rosa. (Aaron Recuenco/Manila Bulletin//Lito Hilidon/Bannawag)
