Binilin ni Presidente Marcos Jr. ti National Bureau of Investigation (NBI) ken ti Philippine National Police (PNP) a siguraduenda a napudno ken patas ti maisayangkat nga imbestigasion mainaig iti napasamak iti Senado idi rabii ti Mayo 13.
Daytoy ti direktiba ni Marcos kada NBI Director Melvin Matibag ken PNP Chief Jose Melencio Nartatez iti naangay a press conference ita nga aldaw, Mayo 14.
Segun ken ni Matibag, binilin ida ni Marcos a masapul a patas ken nakapapati ti aramidenda nga imbestigasion tapno rummuar no asino ti nagkurang ken akin-aramid kadagitoy tapno madusa.
Iti sabali a bangir, impaganetget ni undersecretary ti Presidential Communications Office (PCO) Claire Castro a saan nga imbilin ti gobierno ti pannakakemmeg ni Sen. Ronald "Bato" Dela Rosa nga ipatpatiliw ti International Criminal Court (ICC) gapu iti kasona a crimes against humanity - murder.
Inwaragawag ni Castro a dagiti kameng ti Office of the Sergeant-at-Arms (OSAA) ti Senado ti immuna a nagpaputok, a gapuna a bimmales dagiti kameng ti NBI. (Betheena Unite/Manila Bulletin//Lito Hilidon/Bannawag)
