Sinuspenso ni Ombudsman Jesus Crispin “Boying” Remulla ita nga aldaw, Mayo 15, ni Senate Sergeant-at-Arms Mao Aplasca iti las-ud ti innem a bulan nga awan bayadna, bayat a rugian ti Office of the Ombudsman (OMB) ti panagimbestigarda iti napasamak a panagpaltog iti pasdek ti Senado.
Agepekto a dagus ti preventive suspension ni Aplasca ita nga aldaw.
Segun ken ni Remulla, kasapulan ti preventive suspension tapno maliklikan ti posible a pannakibiang ni Aplasca iti maaramid nga imbestigasion.
Kinuna ni Remulla a serioso la unay ti napasamak iti Senado nangruna ta ni Aplasca ti immuna a nagpaputok iti napasamak a riribuk iti uneg ti Senado.
Segun ken ni Remulla, saan a rumbeng a ti maysa nga opisial ti Senado ket paltoganna ti pannakabagi ti linteg.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Kinuna ni Remulla a rimmuaren ti subpoena para iti closed-circuit television (CCTV) footage ti Senado manipud iti rabii a napasamak ti panagpinnaltog, gapu iti alegasion nga ilemlemmengda ti dadduma a CCTV footage.
Kinuna ni Remulla a mairaman a maimbestigar ti National Bureau of Investigation (NBI), opisial ti Senado, ken opisial ti polis a nagresponde iti insidente, kasta met da Robin Padilla ken Jinggoy Estrada.
Segun ken ni Remulla, obstruction of justice ti kadagsenan a kaso a mabalin a maipila a maibusor kadagiti naglabsing, malaksid iti kaso a gross neglect of duty, failure to maintain public order and safety within Senate premises, ken aiding and abetting a fugitive of justice.
Innayon ni Remulla a babaen ti imbestigasion nga iwayat ti Ombudsman, maammuan no pudno a naigagara ti napasamak iti Senado. (Jel Santos/Manila Bulletin//Lito Hilidon/Bannawag)
