Impakdaar ni Department of Justice (DOJ) Acting Secretary Fredderick A. Vida idi Mayo 15 a maarestar ni Senador Ronald “Bato” Dela Rosa no aggandat a rummuar iti pagilian, ta ibilangda daytoy nga aramid a kas pananglais iti hustisia.
Segun ken ni Vida, naipaulogen ti Immigration Lookout Bulletin Order (ILBO) kontra ken ni Dela Rosa, ket naibilin kadagiti amin a kameng ti Bureau of Immigration (BI) a bantayanda a naimbag ti ania man a gandat ti senador a rummuar iti pagilian.
Kuna ni Vida, a mabalin a tenglen dagiti kameng ti BI ni Dela Rosa bayat nga urayenda dagiti pannakabagi ti linteg a mangarestar kenkuana.
Itay kallabes, inyetnag ti International Criminal Court (ICC) ti warrant of arrest kontra ken ni Dela Rosa a nairaman a kas co-perpetrator iti kaso ni dati a presidente Rodrigo Duterte a crimes against humanity (murder). (Jeffrey Damicog/Manila Bulletin//Lito Hilidon/Bannawag)
