Insingasing dagiti prosecutor ti International Criminal Court (ICC) a marugian ti pannakabista ti kaso ni dati a presidente Rodrigo Duterte inton Nobiembre 30, 2026, idinto a maisaganadan dagiti amin a kasapulanda iti ngudo ti Septiembre.
Iti 17 a panid a dokumento nga impila dagiti prosecutor iti Trial Chamber III ti ICC ti singasingda a petsa ti mangitunda iti napardas a pannakataming ti kaso kalpasan ti confirmation of charges.
Segun iti prosekusion, panggep nga iparang ti 60 agingga 70 a testigo iti panangbista, agraman dagiti insider witness, crime-base witness, ken expert witness.
Kayatda nga iraman dagiti maibilang nga eksperto iti police operation iti drug war iti Filipinas, pannakaanalisar deagiti estatistika ti panangpapatay, ken forensic science.
Kuna ti prosekusion nga adda 197 a bitla ken public statements ni Duterte a mabalin nga iparangda a kas ebidensia.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Iti agdama, mapanen a 5,177 nga ebidensia ti imparangda iti depensa, agraman dagiti 3,000 a material a mainaig kadagiti testigo; idinto a 13,284 nga ebidensia ti reprepasuenda para iti posible a pannakaiparang dagitoy.
Innayon ti prosekusion nga agtultuloy latta ti panagimbestigarda iti kaso ni Duterte ken iti kasasaad ti Filipinas. (Argyll Cyrus Geducos/Manila Bulletin//Lito Hilidon/Bannawag)
