Opisial nga indeploy ti LGU Santa, babaen ti Public Employment Service Office (PESO), dagiti 10 nga SPES Intern nga agtrabaho iti gobierno lokal iti pannakitinnulong ti Department of Labor and Employment (DOLE).
Naidalan dagiti Intern iti komprehensibo nga orientasion tapno maisiguro ti nasayud a transision kadagiti departamento a pakaiwarasanda. Iti panagsarita ni Mayor JJ Bueno III, ginuyugoyna dagiti estudiante a mangitandudo iti integridad ken itedda amin a kabaelanda bayat ti panagtrabahoda iti munisipio. Babaen ti SPES program, agbalin ti LGU Santa a mangrangtay iti pannakaipaay ti edukasion ken pagtrabahuan kadagiti katurturposna iti hayskul. Paset daytoy ti panangtulong ken panangipaay kadakuada iti bileg iti panagsapul ken pannakigasanggasatda para iti naranraniag a masakbayan. Ti masueldo dagiti estudiante iti agmakabulan a panagtrabahoda, agserbinto a nayon ti gastosenda iti mapasungad a panagadalda iti kolehio. (MARILYN C. CONTILLO)
