Inlaksid ti Philippine National Police (PNP) ti naibaga nga adda nangraut iti Senado idi rabii ti Mayo 13 a rimsua ti riribuk gapu iti amak a maarestaren ni Senador Ronald “Bato” Dela Rosa, segun ken ni Sekretario ti Department of the Interior and Local Government (DILG) Jonvic Remulla iti naangay a press briefing iti Malakanyang idi Mayo 19.
Ngem inlawlawag ni Remulla a saanda pay masierto no nairanta wenno naplano ti napasamak a riribuk tapno makalibas aleng ni Dela Rosa.
Ni Senate President Alan Peter Cayetano ti nagkuna nga adda nangraut iti Senado idi Mayo 13 iti Facebook account-na ken iti sango dagiti kameng ti prensa iti sumuno nga aldaw.
Segun iti resulta ti panagimbestigar ti PNP, awan ti pammaneknek iti dayta nga insawang ni Cayetano.
Impaganetget ni Remulla nga adda dagiti kameng ti National Bureau of Investigation (NBI) iti ikub ti GSIS, ket awanda iti mismo nga uneg ti pasdek ti Senado.
Kiddaw a TRO ni Dela Rosa, saan a pinatgan ti Korte Suprema
Kinuna ni Remulla a naibaon dagiti kameng ti NBI sadiay gapu iti kiddaw ni GSIS President and General Manager Jose Arnulfo Veloso tapno maserraan dagiti mabalin a pagserkan ti tao, idinto nga inawagan ni Dela Rosa dagiti pasurotna a mapan "ag-People Power" iti Senado.
Segun ken ni PNP chief Gen. Jose Melencio Nartatez Jr., adda naalada a 44 a kapsula manipud iti crime scene, a mangipasimudaag nga uppat a paltog ti naiputok -- lima kadagitoy ti naggapu iti NBI ken 39 ti naggapu iti OSAA.
Kinuna ni Nartatez nga ayabandanto manen ni Aplasca tapno ilawlawagna no naggapuan dagiti 23 pay a bala manipud iti maysa pay a paltog.
Kinompirmar ni Nartatez ti rekord ti polis a rimmuar ni Dela Rosa iti Senado iti 2:30 iti parbangon ti Mayo 14 a nakalugan iti puraw a Toyota Fortuner a mapapati a kukua ni Sen. Robin Padilla.
Nayawaten kada Presidente Marcos Jr. ken Acting Secretary ti Department of Justice (DOJ) Fredderick Vida ti resulta ti panagimbestigar ti PNP. (Ruth Abbey Gita-Carlos/PNA//Lito Hilidon/Bannawag)
