Impaganetget ti Malakanyang ita nga aldaw, Mayo 20, nga agtalinaed a balido ti warrant of arrest nga impaulog ti International Criminal Court (ICC) a maibusor ken ni Senador Ronald “Bato” dela Rosa kalpasan a saan a pinatgan ti Korte Suprema (SC) ti temporary restraining order (TRO) a kiniddaw ti senador.
Kinuna ni undersecretary ti Presidential Communications Office (PCO) Claire Castro a bigbigen latta ti gobierno a maiparbeng ti pannakaipatungpal ti warrant, idinto nga italekda iti Department of Justice (DOJ) ti pannakaipatarus ken pannakaipatungpal daytoy.
Dinakamat ni Castro ti pagtaktakderan ti Office of the Solicitor General (OSG), a nangibilang ken ni Dela Rosa a kas pugante kalpasan a pimmanaw iti sidong ti Senado.
Impaganetget ni Castro ti kinuna ni OSG a maipatungpal ti warrant of arrest ti ICC ket saanen a kasapulan nga agdalan iti lokal a korte.
Iti saludsod no biangan ni Presidente Marcos Jr. ti pannakaarestar ni Dela Rosa, insungbat ni Castro nga annongen ti presidente nga ipatungpal ti linteg. (Merlina Hernando-Malipot/Manila Bulletin//Lito Hilidon/Bannawag)
