Saan a pinatgan ti Korte Suprema (SC) ti kiddaw ni Senador Ronald Dela Rosa a temporary restraining order (TRO) ken status quo ante order (SQAO) tapno malapdan ti pannakaipatungpal iti warrant of arrest kenkuana nga impaulog ti International Criminal Court (ICC).
Daytoy ti pangngeddeng ti Supreme Court En Banc kalpasan ti naangay nga special session-da ita nga aldaw, Mayo 20.
Babaen ti botos a 9-5-1 (wen-saan-saan a nagbotos), saan nga inanamongan ti SC ti kiddaw ni Dela Rosa a malapdan ti panangipatungpal ti Department of Interior and Local Government (DILG), ti Department of Foreign Affairs (DFA), ti Deparment of Justice(DOJ), Philippine National Police (PNP), ti National Bureau of Investigation (NBI). ti Bureau of Immigration (BI), ti Armed Forces of the Philippines (AFP), ken ti Criminal Detection Group (CIDG) iti ania man a warrant of arrest nga inyetnag ti ICC, red notice manipud iti Internatinal Police Organization (Interpol), wenno ti ania man a panankabagi ti linteg nga awan ti maipaulog a warrant of arrest manipud iti korte ti Filipinas.
Segun iti press briefer nga inruar ti SC ita nga aldaw, dinesisionan laeng ti korte ti kiddaw ni Dela Rosa, idinto a masapul a risutenda pay dagiti kangrunaan nga isyu iti kaso.(Lito P. Hilidon/Bannawag)
