Binilin ti Department of Justice (DOJ) dagiti amin nga ahensia ti pannakabagi ti linteg nga ipatungpalda ti arrest warrant nga impaulog ti International Criminal Court (ICC) kontra ken ni Sen. Ronald “Bato” Dela Rosa gapu iti kasona a crimes against humanity (murder) mainaig iti drug war nga insayangkat ti naglabas nga administrasion.
Inyetnag ni DOJ Secretary Fredderick Vida daytoy a pammilin a pakairamanan ti Philippine National Police (PNP) ken ti National Bureau of Investigation (NBI) idinto a saan a pinatgan ti Korte Suprema (SC) ti kiddaw ni Dela Rosa a malapdan ti pannakaipatungpal ti arrest warrant ti ICC.
Imbinsabinsa ni Vida dagiti makagapu iti pammilin a pannakakemmeg ni Dela Rosa.
Umuna, gapu ta balido ti arrest warrant ti ICC ket nairaman ni Dela Rosa a kas co-perpetrator iti nadara a drug war, ken maikadua, gapu ta napatalgedan a pimmanawen ni Dela Rosa iti Senado a nangted kenkuana iti protective custody.
Ket maikatlo, gapu ta saan a pinatgan ti SC ti kiddaw ni Dela Rosa a TRO; ket maikapat, mabalin nga ipatungpal ti arrest warrant ti ICC.
Impeachment trial ni VP Duterte, marugian inton Hulio 6
Segun ken ni pamnakangiwat ti DOJ Rapahel Martinez, gapu ta saan a nangiruar ti SC iti TRO, awan ti makatubeng iti pannakaipatungpal ti arrest warrant.
Iti sabali a bangir, kuna ni Sekretario ti Department of the Interior and Local Government (DILG) Jonvic Remulla nga agtignay ti sibubukel a puersa ti polis tapno sapulen ken arestarenda ni Dela Rosa.
Nakaalerto amin a puersa ti polis a mangbantay kadagiti amin a mabalin a rummuaran, agraman ti pagruaran iti abagatan.
Kuna met ni direktor ti National Bureau of Investigation (NBI) Melvin Matibag, saan a nasayaat para ken ni Dela Rosa ti rummuar iti Filipinas, ta adda 122 a pagilian ti mangsupsuportar iti ICC. (Aaron Recuenco/Manila Bulletin//Lito Hilidon/Bannawag)
