Nakoronaan a Saniata ti Nueva Vizcaya 2026 ni Leanne Jaye C. Derije bayat ti pannakarambak ti 17th Grand Ammungan Festival a naangay iti Carlos M. Padilla Convention Center iti ili ti Bayombong, Nueva Vizcaya, idi Mayo 21, 2026.
Tubo ti ili ti Aritao ni Derije a nakaala pay iti Best Pick of the Official Photographer ken ti Best in Gown.
Iti paset ti Q&A, nasaludsod no ti AI (Artificial Intelligence), a makaputar itan iti daniw, sarita ken arte iti sumagmamano laeng a segundo, ket mangpabaknang iti masakbayan ti literatura wenno mangkarit iti rikna ken kinapudno ti tao a mamagbalin iti panagistoria nga awan patinggana.
Iti sungbat ni Leanne, binigbigna ti agsaksaknap nga impluensia ti teknolohia, ngem impaganetgetna a saan a matulad ti AI ti kinamanagpartuat ti tao.
"Agpayso a saanen a maliklikan ti (panagusar) ti artificial intelligence. Adda daytoy iti dandani amin nga aramidentayo iti inaldaw, ngem maysa a karit daytoy iti kinasungdo ti tao," kinuna ni Leanne.
10 nga SPES Interns, naideploy iti LGU SANTA
"Mamatiak a ti maysa a wagas tapno agtalinaed a sibibiag ti maysa a banag ket ti agtultuloy a panangisaritatayo kadagitoy, ti agtultuloy a panangpartuat kadagitoy. Kariten ti AI ti kinamanagpartuattayo, ngem masapul nga agtalinaedtayo a napinget ken natibker. Masapul nga ipakitatayo nga addaantayo iti puso a dinto matulad ti artificial intelligence. Ta ngamin, kakabsat ken gagayyem, managpartuat dagiti Novo Vizcayano, ket kasta ti rumbeng a panagbiag ti kulturatayo," innayon ni Leanne.
Nagun-od met ni Rhaiza Shayne A. Tenenan (Dupax del Sur) ti first runner-up ken ti Ms. Personality, Netizens’ Award ken Gandang Novo Vizcayano Award; second runner-up ni Jerianne Zhanely DL Sanchez (Bayombong).
Ni Ashlyngold S. Vicente (Quezon) ti nangyalat iti 3rd runner-up ken Best in Swimsuit, idinto a 4th runner-up ni Shemaiah Micah G. Mabezza (Solano).
