Indeklarar ni Presidente Marcos Jr. a regular holiday inton May 27, 2026 para iti pannakarambak iti Eid’l Adha, wenno ti Feast of Sacrifice, segun iti Proclamation No. 1264 a naipaulog idi Mayo 21.
Maitunos daytoy iti Republic Act (RA) No. 9849, a mangbigbig iti maika-10 nga aldaw ti Zhul Hijja, ti maika-12 a bulan ti kalendario ti Islam, a kas national holiday a mabalin a mayakar ti petsana.
Segun iti 1447 Hijrah Islamic Lunar Calendar, inrekomendar ti National Commission on Muslim Filipinos a Mayo 27 ti pannakarambak ti Eid’l Adha ita a tawen.
Ti Eid’l Adha ti maysa kadagiti dua a kadakkelan a piesta iti Islam.
Ngilinen dagiti minilion a Muslim iti pagilian ti Eid’l Adha babaen ti panagkararag, panagtitipon dagiti pamilia, ken naimbag nga aramid a mangisimbolo iti kinatulnog, sakripisio, ken panagayat. (Manila Bulletin Newsroom//Lito Hilidon/Lito Hilidon)
