Impakdaar ni Senador Panfilo Lacson ita nga aldaw, Mayo 22, saan nga agballigi ti ania man a panggep a mangipalubos ken ni Sen. Ronald Dela Rosa a makipartisipar babaen ti online, saan laeng a para iti impeachment trial ni Bise Presidente Sara Duterte, no di ket pay iti plenario.
Inlawlawag ni Lacson ti paglintegan ti Senado a mangipalubos iti virtual participation no adda ti didigra wenno di ninamnama a pasamak kas iti angol ti Covid.
Segun ken ni Lacson, saan pay a naanamongan daytoy a singasing nga indatag ni Sen. Rodante Marcoleta, a palukayan ti proseso tapno mapalubosan ti online a pannakipartisipar iti sesion ti Senado ken iti impeachment trial.
Kinuna ni Lacson a saan a balido ti mosion ni Marcoleta ta masapul pay nga amendaran ti Senado ti paglinteganda ken agdalan iti umno a proseso.
Innayon ni Lacson a no maipanggep iti impeachment court, masapul a desisionda daytoy kas maysa nga impeachment court, a maiduma iti paglinteganna ti Senado.
Mayo 27, naideklarar a regular holiday para iti Eid’l Adha
Kinanunongan ni Lacson ti imbaga da Sen. Erwin Tulfo ken Sen. Risa Hontiveros, a nangsupiat met iti singasing ni Marcoleta.
Impaganetget dagiti senador a masapul a pisikal nga addada iti Senado no kayatda ti makipaset iti pannakataming dagiti kangrunaan a pakaseknan ti pagilian. (Hannah L. Torregoza/Manila Bulletin//Lito Hilidon/Bannawag)
