Kaso nga administratibo ken kriminal ti impila ti Cybercrime Investigation and Coordinating Center (CICC) kontra iti bise mayor ti Reina Mercedes, Isabela a ni Atty. Harold Respicio idi Mayo 22.
Segun ken ni direktor ti National Bureau of Investigation (NBI) Melvin A. Matibag, nadumaduma ti ipilada a kaso kontra ken ni Respicio kas iti sedition, rebellion, unlawful publication, ken unlawful utterances, gapu iti mapapati nga insawsawangna maipanggep iti gobierno.
Gapu ta maysa nga abogado, mabalin pay a maipila ti disbarment complaint kontra ken ni Respicio iti Integrated Bar of the Philippines.
Maibasar iti complaint-affidavit ti CICC, adda insawang ni Respicio iti publiko idi naangay ti maysa a taripnong a mangsupiat iti gandat a pananglapped iti panagngayangay ni Bise Presidente Sara Duterte a kas presidente inton 2028.
Iti nasao a taripnong, daytoy ti imbaga ni Respicio: "No saanen nga agan-andar ti pamunganayan a prinsipio ti Konstitusiontayo iti demokrasia, ania ti sungbat? Rebolusion."
Singasing a virtual participation iti impeachment trial, sesion ti Senado, saan nga agballigi -- Sen. Lacson
Kinuna ni CICC Executive Director Aboy Paraiso a nangipila iti kaso, a saanen a mapalubosan iti social media dagiti mapapati nga insawang ni Respicio.
Inlawlawag ni Paraiso a saan a panangikuspil iti wayawaya iti panangipeksa ti panangipilada iti kaso, idinto nga adda legal a pagpatinggaan ti wayawaya iti panagsao. (Jeffrey Damicog/Manila Bulletin//Lito Hilidon/Bannawag)
