Manamnama a makaruaren dagiti 38 a Filipino a marino a nagtrabaho iti cruise ship a naipakdaar nga inapektaran ti hantavirus, kalpasan ti 40 nga aldaw a pannaka-quarantine-da, idinto nga awan ti pagilasinan a naimpektaran dagitoy, segun iti Department of Migrant Workers (DMW).
Nupay negatibo iti hantavirus ken awan ti pagilasinan a naimpektar dagiti Filipino a tripulante ti MV Hondius, kinuna ni sekretario ti DMW Hans Leo Cacdac a masapul latta a leppasen ti quarantine kas paset ti paglintegan iti kinatalged ti salun-at.
Segun ken ni Cacdac, 21 a Filipino ti immuna a simmangpet iti Netherlands idi Mayo 6 tapno maipasidongda iti quarantine, idinto a simmaruno ti 17 a tripulante idi Mayo 18, ngem malpasda amin inton Hunio 18.
Iti sabal a bangir, nagyaman ni Cacdac kadagiti autoridad ti Netherlands gapu iti mapardas a panagresponde, medikal a tulong, ken pannakikoordinarda a nangtulong kadagiti Filipino.
Nakiuman ti DMW, a kinuyog ni Berlin Labor Attaché Delia Palomar, iti pannakabagi ti Oceanwide Expeditions nga akinkukua iti barko, ken iti Wagenborg a lisensiado nga ahensia, tapno pagsaritaanda ti kasasaad dagiti Filipino a tripulante ken iti panagsublida iti Filipinas. (Aaron Recuenco/Manila Bulletin//Lito Hilidon/Bannawag)
