Balligi ti panangiwaras ti Gobierno Lokal ti Santa iti ₱3.00/kg Corn Procurement Incentive iti 211 a nagaget a benepisiario a mannalon nga agmulmula iti mais iti lokalidad ti Santa, Ilocos Sur, babaen ti pannakikayammet ti Pabliford Agricultural Supply. Naangay ti distribusion iti cash incentive idi Mayo 23, 2026 iti Santa Farmers Multipurpose Building. Naibasar ti insentibo iti produksion dagiti mannalon.
Kinuna ni Mayor Atty. JJ Bueno III nga agtultuloy a maiwayat daytoy nga inisiatibo kas panangbigbig ken panangsuporta iti dakkel a kontribusion ti sektor ti agrikultura. Impeksa pay ti ama ti ili ti panagyamanna kadagiti dadaulo dagiti mannalon iti panangasistirda ken koordinasionda kadagiti amin a mannalon a nakikaykaysa tapno maisiguro ti naurnos, ken episiente a proseso ti distribution.
“Agbiag ti mannalon nga Santanian! Babaen ti panagkaykaysa, agtultuloy ti panangapittayo iti bunga ti progreso ti ilitayo,” kinuna pay ti ama ti ili. (MARILYN CORRLES CONTILLO)
