Impasigurado ni Presidente Marcos Jr. kadagiti biktima ti dakkel nga uram iti Parola Compound iti Binondo, Manila ti agtultuloy a panangipaay ti gobierno iti tulong agingga a maallangonda ti biagda, ken makaawiddan.
Sinarungkaran ni Marcos ti maysa nga evacuation center and Delpan Sports Complex ita nga aldaw, Mayo 25, tapno personal a mangibunong iti ayuda kadagiti naapektaran a residente.
Segun ken ni Marcos, agtitinnulong ti Department of Social Welfare and Development (DSWD), dadduma pay nga ahensia ti gobierno, agraman ti gobierno ti Siudad ti Manila, a mangipaay iti ayuda kadagiti naapektaran a pamilia.
Kuna ni Marcos a maikkan dagiti naapektaran a pamilia iti hygiene kits, family food packs, ken pinansial a tulong nga agbalor iti ₱10,000 manipud iti nailian a gobierno.
Innayon ni Marcos a mangipaay ti Department of Human Settlements and Urban Development (DHSUD) kadagiti materiales tapno matulongan dagiti pamilia a mangipatakder manen iti balayda; idinto a mangipaay met ti National Housing Authority (NHA) iti nayon a ₱30,000 kadagiti naapektaran a pamilia. (Argyll Cyrus Geducos/Manila Bulletin//Lito Hilidon/Bannawag)
