Nakasagana ni Presidente Marcos Jr. a makitrabaho iti asino man a daulo ti Senado, no la ketdi maipaay dagitoy para iti pagsayaatan dagiti Filipino.
Daytoy ti kinuna ni undersecretary ti Presidential Communications Office (PCO) Claire Castro kalpasan ti imbaga ni Senador Rodante Marcoleta a ti laeng liderato ni Senate President Alan Peter Cayetano ti panagkudeta iti Senado nga awan pammalubos ti Malakanyang.
Iti naangay a press briefing ita nga aldaw, Mayo 25, impaganetget ni Castro nga awan ti parikut ti presidente no asino man ti mangidaulo iti Senado. Ngem kinuna ni Castro a saan a pudno ti imbaga ni Marcoleta nga adda akem ti Malakanyang iti panagbaliw iti liderato ti Senado.
Idi nasaludsod no agtalek pay ni Marcos iti panangidaulo ni Cayetano, kinuna ni Castro a yumanna pay iti presidente daytoy a banag.
Iti sabali a bangir, inaklon ti Malakanyang a saandan a masierto no kabaelan pay a maipasa dagiti kangrunaan a singasing a paglintegan ti administrasion sakbay ti Hunio, gapu iti riribuk iti Senado. (Argyll Cyrus Geducos/Manila Bulletin//Lito Hilidon/Bannawag)
