Kiniddaw ti Office of the Ombudsman (OMB) ti pannakaipaulog ti Precautionary Hold Departure Orders (PHDOs) a maibusor kada Sen. Rodante Marcoleta, dati a kongresman Michael “Mike” Defensor, ken dua pay a kakaduada.
Ti PHDO ket maysa a pammilin ti korte a mangiparit iti maysa a tao a rummuar iti Filipinas gapu iti naipila a kaso a kriminal bayat nga im-imbestigaren ti Department of Justice (DOJ) wenno ti OMB daytoy.
Segun iti raffles sheet ti Sandiganbayan a nairuar idi Mayo 25, naipila ti kaso a plunder, indirect bribery, ken pananglabsing iti Presidential Decree No. 46, a mangiparit kadagiti opisial ti gobierno nga umawat iti sagut, ken kadagiti pribado a tao a mangted iti sagut.
Naidarum da Marcoleta, Defensor, Joseph Varias Espiritu, ken Aristotle Baluyut Viray iti plunder, gapu iti panangawat ni Marcoleta iti sagut nga agdagup iti ₱75 a milion iti tallo a nadumaduma a paset, idi agpapaay a kas kongresman.
Segun iti OMB, immawat ni Marcoleta iti ₱30 a milion manipud ken ni Defensor idi Enero 6, 2025; ₱25 a milion manipud ken ni Espiritu idi Enero 8, 2025; ken ₱20 a milion manipud ken ni Viray idi Enero 9, 2025.
Kiddaw a TRO ni Dela Rosa iti SC, saan a napatgan gapu iti kinakurang ti merito
Binilin ti OMB dagiti naidarum a mangidatag iti counter-affidavit-da, 15 nga aldaw kalpasan a maawatda ti pammilin. (Jel Santos/Manila Bulletin//Lito Hilidon/Bannawag)
