Babaen ti botos a 9-5-1 (wen-saan-abstain), inkeddeng ti Korte Suprema (SC) a saan a mapatgan ti kiddaw ni Sen. Ronald "Bato" dela Rosa a temporary restraining order (TRO) wenno status quo ante order (SQAO) a manglapped koma iti pannakaarestarna gapu iti impaulog ti International Criminal Court (ICC) a warrant of arrest.
Siam a hues ti nangikeddeng a saan a mapatgan ti kiddaw ni Dela Rosa a TRO, a pakairamanan da Chief Justice Alexander G. Gesmundo, Senior Associate Justice Marvic M.V.F. Leonen, ken Associate Justices Alfredo Benjamin S. Caguioa, Rodil V. Zalameda, Samuel H. Gaerlan, Jhosep Y. Lopez, Jose Midas P. Marquez, Maria Filomena D. Singh, ken Raul B. Villanueva.
Innem kadagitoy ti dinutokan ni dati a presidente Rodrigo Duterte: Gesmundo, Zalameda, Gaerlan, Lopez, Marquez, ken Singh; idinto a dua kadakuada -- da Leonen ken Caguioa -- ti dinutokan ni dati a presidente Noynoy Aquino. Ni Marcos ti nangdutok ken ni Villanueva.
Saan a dimamar-ay (on leave) ni Associate Justice Japar B. Dimaampao, a maysa kadagiti dinutokan ni Duterte, idi tinamingda ti mosion ni Dela Rosa idi Mayo 20.
Iti sabali a bangir, lima a hues a dinutokan ni Duterte ti immanamong iti kiddaw ni Dela Rosa a TRO, a da Associate Justices Ramon Paul L. Hernando, Amy C. Lazaro-Javier, Henri Jean Paul B. Inting, Ricardo R. Rosario, ken Antonio T. Kho Jr.
Hold departure order kontra kada Marcoleta, Defensor, kdp., kiniddaw ti Ombudsman iti Sandiganbayan
Iti walo a panid a desision ti SC a nairuar idi rabii ti Lunes (Mayo 25), kinuna ti SC a maiparbeng ti pannakairuar ti TRO no adda nabatad ken saan a mapagduduaan a kalintegan a rumbeng a masalakniban, kasta met ti nakaro a pananglabsing iti kalintegan ti agkidkiddaw.
Inlawlawag ti SC a ti laeng pannakaipaulog ti TRO ti dinesisionanda, idinto a masapul pay a risutenda dagiti kangrunaan nga isyu iti kaso.
Impaganetget ti SC a saan a naipakita ni Dela Rosa nga adda nadagsen a rason para iti pannakaipaulog ti TRO a pabor kenkuana.
Dinakamat ti SC ti deklarasion ni Presidente Marcos Jr. idi Mayo 13, 2026 a saanna nga imbilin ti pannakaarestar ni Dela Rosa, ket ngarud, saan a makuna a nalabsing ti kalintegan ni Dela Rosa.
Iti concurring opinion ni Associate Justice Benjamin Caguioa, kunana a saan a rumbeng a tulongan ti Korte ti maysa a tao, maysa nga opisial ti gobierno, a naidarum iti pannakapapatay ti adu a tao, ken maipan iti ICC tapno sanguenna dagiti bunga ti ar-aramidna a nanglais iti panagturay ti linteg nga awan pannakadusana.
"Masapul nga agannad ti Korte a saan a mausar a kas nalaka a politikal a pagkamangan, tapno mapunas dagidiay napno iti dara dagiti imada," innayon ni Caguioa. (PNA//Lito Hilidon/Bannawag)
