(MAIKA-9 A PASET)
NABAYAG sakbay a naalak ti naan-anay a tured-pakinakem a mangallop ken ni Maria Emmanuelle. Pinalabasko pay ti sumagmamano a kopa ti wiski sakbay a napagsimpak ti pakinakemko nga agtamed iti sanguananna. Slow drag ti pinilik a tokar.
Kasta met a napalabas pay ti sumagmamano a kopa ti whisky ken sonata sakbay a naituredko ti agpudno. No ania la ditan ti nagpatpatanganmi. Sweet nothings, kas pagsasao.
“A-adda kayatko nga ipudno kenka,” nasaok met laeng idi agangay. Nagkiakak kadi?
Singasing nga online voting iti Senado, saan nga anamongan ni Presidente Marcos
“Ania?”
“K-kua, amangan no makaungetka.”
“Apay koma a makaungetak?”
“Sabagay,” nagalimonak, “ammok nga ammomon ti nabayagen a kayatko nga ibaga kenka. Ammok a nadlawmon, idi pay...”
Nagkatawa iti apagapaman. “Sika met... kasano koma nga ammok idinto ta awan met ti ibagbagam kaniak, no ania man dayta?”
Kinabigko. Nariknak ti kinabaknang dagiti barukongna a naipideg iti barukongko. Nariknak ti kinalamuyot dagiti akin-uneg a paset ti luppona kadagiti luppok. Nakariknaak iti naisangsangayan a gil-ayab.
“K-kua ngamin, nasursurokan nga ipateg,” inyarasaasko kenkuana. “I... I love you,”
Napasardeng iti panagkompasna, inyadayona ti bagina kaniak. Pinerrengnak.
“Ita, ammomon,” kinunak. “Naibagakon ti nabayagen a kayatko nga ibaga kenka. I love you...”
Nagngilangil.
“A-apay?”
“Lumablabbasitka,” kinunana ketdi. “Dumerderosaska.” Nagkatawa iti nalab-ay. “Napalaluam sa ketdi, aya?”
“Rosas ni ayat, Emma.”
“Saan a rosas amin nga ayat, Mister Arquero.”
“A-ania ti kayatmo a sawen?”
“Agtalinaedta laengen nga agpagayam. Saanen a lumbes pay iti dayta.”
Napamulenglengak. Nakadlaw ni Maria Emmanuelle, rinugianna a kompasan ti tokar. Sinurotko a kompasan nupay kasla mataltalimpungawak iti panagriknak.
“E-Emma...”
“Saanak nga agang-angaw.”
“U-uray siak...”
“Idi pay laeng, ammok nga agtungpal iti kastoy ti amin. Ngem kayatko nga ipakaasi kenka, let’s just be the best of friends. I thank you for the attention you’re giving me.”
Basted, nakunak iti bagik. Ket iti lansad ti barukongko, nakariknaak iti kasla awan kapadpadna a saem.
A, NGEM napeklanak a dagullit, kas naipakpakaunakon. Saanak a nalaka a maup-upay. Imbes a sumukoak, intuloyko latta nga inarem ni Maria Emmanuelle.
Manen, nagpatulongak ken ni Ferdie Manzano.
“Bilibak a talaga kenka,” inkantiaw kaniak ni Ferdie. “Dimo kayat ti maislaanan. Mamatika nga adda ibunga ti panagan-anus.”
“No adda anus, adda met kano lamut!” inyangawko met. Sa nagseriosoak. “Diak man ammo, pards. Ngem sabali a talaga daytoy. Ita la’ng a makariknaak iti kastoy...”
“At least, adda riknamon!” inkatawa ni Ferdie.
“Adda metten dagiti immu-una nga inaremko—sumagmamano met kadakuada ti napagtinnagko— ngem saanak a kastoy, pards. Kas itay kunadan, iba ang arrive!”
Namulenglengannak ni Ferdie. Napalingaling iti apagapaman. “Bueno, kas nakunak idin,” kinunana, “tulonganka gapu ta napategka a gayyem.”
“Thank you, pards...”
“Ngem adda laeng kayatko nga ipakauna...”
“Ania?”
“Awan koma ti pinnabasol iti nagbaetanta gapu iti daytoy, pards.”
Minulenglengak.
“Ania man ti ibunga ti dawdawatem a tulongko,” inlawlawagna, “saanto koma a siak ti makabasol. Ammok nga ammom nga adda dagiti tao a no kasta a saan a nagbunga iti nasayaat ti itutulongda a kas namnamaen, isudan ti pakaipabaklayan ti amin a pannidir. Timmulong la ngaruden ‘diay tao, isu pay ti mapabasol no kasta a mapaay ti ania man a panggep daytoy.”
“Sika met.” Pinilitko ti umisem. “Saan a kasta ti kinarabaw ti utekko, pards. Diak maaramid ti kasta kenka.”
“Awan ti kas iti agsakbay, pards.”
“Sabaliak a mangbigbig iti utang a naimbag a nakem iti maysa a napateg a pagayam, pards. Isu a tulongannak ken ni Emma, wen?”
“Aramidek ti ania man a kabaelak.”
NGEM uray iti tulong ni Ferdie, saan a nalunag ti mulinaw a pangngeddeng ni Maria Emmanuelle.
“Pudno ti kinunam, pards,” kinuna ni Ferdie kaniak. “Sabali a klase a babai ni Marielle. No agsasaritakami, kanayon a dakamatenka kenkuana.”
“Ket?”
“Umis-isem laeng idi damo, pards. Ngem idi kalman, winarningannakon...”
“W-warning?”
Nagtung-ed. “Dinawatna a no mabalin, isardengkon ti mangdakdakamat kenkuana kadagiti maipapan kenka. No saan...”
“No saan... ania?”
“Saannakto kanon a kasasao.”
Immangesak iti nauneg. “Napudnoka a kas gayyem,” kinunak kenkuana. “Agyamanak kadagiti amin a naitultulongmo kaniak ken ni Maria Emmanuelle.”
“Pasensiakan, pards. Inaramidko ti amin a kabaelak. Ngem...”
“Awan ti rumbeng nga idawatam iti pasensia, pards.”
“Kasta man, saanka koma a maawanan iti namnama,” imbalakad ni Ferdie. “Amangan no susuotennaka laeng. Kayatna a takuaten no nalakaka a maup-upay.”
Kayatko a patien a kasta. Ipakitak ken ni Maria Emmanuelle a sabaliak a klase ni Ilokano. Mabalinko a takderan uray kaano man ti kinangisit dagiti sikok.
Manen, kinasaritak ni Maria Emmanuelle iti maysa a malem. Napasamak daytoy iti sirok ti narukbos nga akasia iti uneg ti kampus.
“Sorry a talaga,” kinunana. “Dika koma masaktan ngem awan ti panggepko a mangaklon iti ididiayam nga ayat. Isu a dawatek a sardengannak koman.”
“No kastoyak man,” inkalintegak, “agsipud ta pudno unay nga ay-ayatenka.” Ne, siak kadi nga agpaysao daydiay agsasao? “I really care for you.”
“Love must be mutual, saan kadi?”
“Nakasaganaak nga aguray agingga iti panawen a masursuronak nga ayaten.”
“Unfair dayta para kenka agsipud ta awan ti mauraymo kaniak.”
“Maisuro met ti puso nga agayat, Emma.”
“Wen, akuek ti kinapudno nga ipatpategnak. Ken kasta met a mariknak a napudno dayta a panangipategmo kaniak. Ngem dispensarem ta saanko a marikna ti marikriknam.”
Immangesak iti nauneg. “Ala wen, bastedak iti ayatmo. Awan ti kaimudingak dita pusom. Nasakit man, masursurok met ngata nga akuen dayta. Ngem kayatko a maammuan dagiti gapuna no apay.”
Napamulengleng kaniak. Sa nagdumog kalpasanna. “D-dakkel ti gapuna,” kinunana idi agangay. “Gapuna a saanka a mabalin nga ayaten.”
Kellaat, nagsubli iti isipko ti surat a nakitak a basbasaenna iti naminsan. “Adda kadi boyfriend-mon?”
“Basta diak kayat nga ayatenka.”
(Maituloyto)
