Maiditenar ni Senador Jose “Jinggoy” P. Ejercito Estrada iti New Quezon City Jail iti Payatas, a yan ni dati a senador Ramon “Bong” Revilla Jr., kalpasan a maipatungpal ti warrant of arrest manipud iti Sandiganbayan maigapu iti kasona a plunder, segun iti 5th Division Clerk of Court idi Hunio 1.
Naipaulog met ti warrant of arrest kadagiti dadduma pay a naidarum iti plunder gapu iti mapapati a pannakairamanda iti naisingit a pondo ken kickback mainaig kadagiti proyekto ti Department of Public Works and Highways (DPWH) a da dati a DPWH Secretary Manuel Bonoan, Assistant District Engineer Denryl Caesar S. Cortuna, ken dagiti District Engineer a da Manny B. Bulusan ken Arturo L. Gonzales Jr.
Malaksid iti plunder, naidarum pay da Estrada ken Bonoan iti dua a kaso ti panagkunniber (graft) iti Second Division ken iti 5th Division ti Sandiganbayan.
Iti New Quezon City Jail ti yan ni Revilla a naidarum met iti panagkunniber (graft) ken malversation of funds, mainaig iti ₱92.8 a milion ti gatadna a flood control project iti Pandi, Bulacan. (Jel Santos/Manila Bulletin//Lito Hilidon/Bannawag)
