Inawis ti Blue Ribbon Committee ti Senado ni dati a House Speaker Leyte 1st District Rep. Martin Romualdez iti panangituloyda iti panagimbestigar iti naanomalia a flood control project.
Segun ken ni Sen. Pia Cayetano, baro a daulo ti Blue Ribbon Committee, inikkanda iti pormal nga awis dagiti agpaay a kas resource person iti hearing a maangay inton Hunio 4.
Malaksid ken ni Romualdez, 33 pay a tao ti inawisda, a pakairamanan ni Levito Baligod nga abogado dagiti 18 a tao a nagkuna a dati a kameng ti Philippine Marines.
Segun kadagiti 18 a mapapati a dati a Marine, nangitulodda kadagiti maleta a napno iti kuarta, a maipagarup a kickback manipud iti naanomalia a flood control project, kadagiti opisial ti gobierno a pakairamanan da Romualdez, dati a party-list representative Zaldy Co, ken pati ni Presidente Marcos Jr. ken ti pamiliana.
Naidarum ni Baligod ken dagiti 18 nga ex-Marine iti perjury ken cyber libel iti Department of Justice (DOJ), kasta met a nakasuanda iti unlawful use of means of publication ken unlawful utterances. (Hannah L. Torregoza/Manila Bulletin//Lito Hilidon/Bannawag)
