Babaen ti botos a 265-14-8 (wen-saan-abstain), opisial a naikkaten ni Francisco "Kiko" Barzaga a kas kongresman ti Cavite 4th District idi Hunio 2, gapu iti kinaringgor, saan a maitutop a kababalin, ken pananglabsingna iti Code of Conduct ti Kamara.
Iti plenary session ti Kamara idi Hunio 2, imparang ni 4Ps Party-list Rep. JC Abalos, daulo ti Committee on Ethics and Privileges, ti rekomendasionda iti Committee Report (CR) No. 298 a nangtaming iti ethics complaint nga impila ni Deputy Speaker Iloilo 1st district Rep. Janette Garin kontra ken ni Barzaga.
Maipuon daytoy iti mauli-ulit a panangkurkuriro ni Barzaga iti sesion ti Kamara, saan a panangraem kadagiti padana a kongresman, ken panangusar iti social media a makadadael iti dayaw ken kinasin-aw ti institusion (Kamara).
Segun iti Ethics Committee, linabsing ni Barzaga ti 141(a) ken (b) ti House Rules nga agkunkuna a masapul nga agtignay dagiti kameng ti Kamara iti wagas a mangipakita iti kinatakneng ti Kamara ken mangtungpal iti anag ken letra ti paglintegan ti Kamara.
Kinuna ti Ethics Committee a saan a natungpal ni Barzaga ti propesionalismo segun iti Republic Act (RA) 6713, wenno ti Code of Conduct and Ethical Standards for Public Officials and Employees.
Presidente Marcos, nagpaayab iti special session ti Kongreso inton Hunio 17
Iti sabali a bangir, agbalinen a "moot and academic" ti ethics complaint nga impila ni National Bureau of Investigation (NBI) Director Melvin Matibag a maibusor ken ni Barzaga.
Maipuon daytoy iti saan a maikanatad a paskil ni Barzaga iti Facebook-na maimaig iti napasamak a riribuk iti Senado idi Mayo 13. (Ellson Quismorio/Manila Bulletin//Lito Hilidon/Bannawag)
