Ginutigot ni Presidente Marcos Jr. dagiti Senador ita nga aldaw, Hunio 3, ket kinunana a masapul nga agsublidan iti trabahoda, kalpasan a saan a dimmar-ay dagiti kameng ti majority bloc iti sesionda idi Hunio 1 ken 2.
Segun ken ni Marcos, dagiti napasamak iti Senado iti kallabes ti nangitunda iti pannakawarawara ti institusion ken ti liderato daytoy.
Kinuestionar ni Marcos no apay a saan nga agtrabtrabaho ti lehislatura idinto nga agtultuloy ti panagtrabaho dagiti dua a sabali pay a sanga ti gobierno -- ti ehekutibo ken ti hudikatura.
Impaganetget ni Marcos a kasungani daytoy iti kayatda a magun-od, nangruna iti tiempo ti emerhensia.
Kinuestionar ni Marcos ti pannakakanselar ti sesion ti Senado iti dua a nagsaruno a daras ken ti wagas a pannakaaramid daytoy, idinto a saan nga umdas a rason ti panangkuyog ti dadduma a senador iti maysa a kaduada a naarestar.
Presidente Marcos, nagpaayab iti special session ti Kongreso inton Hunio 17
Segun ken ni Marcos, a nagpaay met a senador, sakbay a makanselar ti sesion ti Senado, masapul a mapakaammuan ti Kamara iti las-ud ti tallo nga aldaw sakbay ti pannakakanselar ti sesion, ken masapul nga adda nadagsen unay a rason iti panangkanselar iti sesion.
Nasurok a 20 a paglintegan ti naibilang a prioridad ti administrasion idi Pebrero a masapul a maipasa ita a bulan, ket kuna ti presidente nga ad-adalenda no ania dagiti mabalin nga aramidenda tapno marisut daytoy. (Betheena Unite/Manila Bulletin//Lito Hilidon/Bannawag)
