Impila dagiti human rights group ti kaso nga obstruction of justice kontra kada senador Alan Peter Cayetano ken Robin Padilla iti Office of the Ombudsman ita nga aldaw, Hunio 3, mainaig iti panaglibas ni Sen. Ronald Dela Rosa idi Mayo 14.
Mairaman kadagiti naidarum ni retired police general ken Senate Sergeant-At-Arms Mao Aplasca.
Segun ken ni Tindig Pilipinas convenor Francis Joseph Aquino Dee, indarumda dagiti opisial tapno maipakita nga awan ti nangatngato ngem iti linteg no maipanggep iti pannakadusa dagiti naglabsing iti linteg ken nangdadael iti panagtalek ti publiko.
Kuna ti grupo a Tindig Pilipinas a saan nga apektaran ti panangidarumda ti panagimbestigar ken case build-up nga isaysayangkat ti Department of Justice (DOJ).
Innayon ni Dee nga inikkanda iti kopia ti International Criminal Court (ICC) gapu ta maseknan met daytoy iti panaglibas ni Dela Rosa. (Aaron Recuenco/Manila Bulletin//Lito Hilidon/Bannawag)
