Nabotosan ni Senador Sherwin Gatchalian a kas baro a Senate President Pro Tempore ket isu ita ti acting Senate President bayat ti kaawan ni Senate President Alan Peter Cayetano, ita nga aldaw, Hunio 3.
Gapu iti idadar-ay ni Sen. Francis “Chiz” Escudero, a maysa a kadua ni Cayetano, nabukel ti 12 a senador ti simple majority ken quorum, ket maangay ti sesion.
Ni Sen. Vicente “Tito” Sotto III ti nangimosion a maideklarar amin a pagsaadan a bakante, malaksid iti pagsaadan ti Senate President, kalpasan a nainominar ni Gatchalian a kas Senate President Pro Tempore.
Sinukatan ni Gatchalian ni Sen. Loren Legarda, ket indauluanna ti sesion ita nga aldaw, Hunio 3, ti maudi nga aldaw ti sesion ti Senado sakbay ti sine die adjournment daytoy.
Ti idadar-ay ni Escudero ti nangitunda iti pannakabukel ti baro a majority bloc a pakairamanan da Gatchalian, Sotto, Senador Panfilo “Ping” Lacson, Risa Hontiveros, Paolo “Bam” Aquino IV, Francis “Kiko” Pangilinan, Manuel “Lito” Lapid, Joseph Victor “JV” Ejercito, Juan Miguel “Migz” Zubiri, Raffy Tulfo, Erwin Tulfo, ken Escudero.
Ti liderato ni Gatchalian ti bigbigen ti Malakanyang --USec. Castro
Nabotosan a daulo ti komite da Senador JV Ejercito (Finance); Sotto (National Defense); Panfilo Lacson (Public Order ken Accounts); Erwin Tulfo (Accountability of Public Officers and Investigations wenno ti Blue Ribbon Committee ken Social Welfare and Rural Development); Raffy Tulfo (Public Services); Bam Aquino (Basic Education); Francis Pangilinan (Agriculture); Risa Hontiveros (Health); Lito Lapid (Games and Amusement); Escudero (Housing); ken Zubiri (Committee on Rules ken Foreign Relations).
Naisaad da Renato Bantug Jr. a kas Senate Secretary ken retired Police Maj. Gen. Alfredo Sotto Corpuz a kas Sergeant-at-Arms.
Sakbay a malpas ti sesion, inlawlawag ni Gatchalian a kapilitan nga angayenda ti sesion ta naituding a mangrugi ti sesionda idi Hunio 1 ken 2, ngem saan a dimmar-ay ni Cayetano iti dua nga agsaruno nga aldaw. Dinakamat ni Gatchalian ti Article VI, Section 16(5) ti Constitution.
Dinakamat met ni Gatchalian ti pangngeddeng ti Korte Suprema iti kaso ti Avelino vs. Cuenco nga agkunkuna a ti absolute majority a 12 iti 23 a senador ket mabalin a maibilang a constitutional majority ti Senado para iti panagbilang iti quorum a nangibasaran dagiti senador idi Mayo 5, 2015 a nangibilang iti quorum a 12 idinto nga adda laeng 17 a natda a senador, gapu ta awanen iti hurisdiksion ti Senado kadagiti pito a senador. (Hannah L. Torregoza/Manila Bulletin//Lito Hilidon/Bannawag)
