Inanamongan ti Kamara idi Hunio 3 iti maikatlo ken maudi a pannakaibasana ti gakat nga Anti-Political Dynasty Law -- ti paglintegan a mangiparit iti political dynasty kas maitunos iti 1987 Constitution.
Babaen ti botos a 267-20-7 (wen-saan-abstain), indeklarar ni Deputy Speaker Cebu 5th district Rep. Vincent Franco "Duke" Frasco a naaprobaran ti House Bill (HB) No. 8389 nga inlungalong da House Speaker Isabela 6th district Rep. Faustino "Bojie" Dy III ken Majority Leader Ilocos Norte 1st district Rep. Sandro Marcos.
Iparit ti HB No. 8389 ti aggiddan a panagakem dagiti agassawa ken agkabagian agingga iti second degree of consanguinity or affinity iti nabotosan a pagsaadan iti agpada a political jurisdiction.
Segun kadagiti kongresman, ti Anti-Political Dynasty Bill ti mangtungpal iti immandar ti 1987 Constitution tapno mapasaknap ti pannakipaset iti politika, mangisubli iti panagtalek ti publiko,ken manglukat kadagiti gundaway kadagiti agpaay nga opisial, saan laeng a kadagiti pamilia ti politiko. (Ellson Quismorio/Manila Bulletin//Lito Hilidon/Bannawag)
