Insayangkat latta da Senate President Alan Peter Cayetano, Sen. Pia Cayetano, ken Rodante Marcoleta ti hearing ti Blue Ribbon Committee mainaig iti mapapati nga anomalia iti flood control project, ket impilitda a saan a nainkalintegan ti inaramid ti grupo ni Gatchalian a nangpabaro kadagiti daulo ti komite gapu ta saanda a nadanon ti bilang a 13, a mangbukel iti makunkuna a quorum iti sesion.
Impaganagetget ni Pia Cayetano a legal ti inaramidda a hearing ken ti liderato ni Marcoleta iti subcommittee, ket kinunana a narigat a makastrek dagiti inawisda a resource person ken kameng ti media iti uneg ti Senado.
Dinillaw ni Marcoleta ti kaawan dagiti dadduma nga opisial a pinaayabanda, agraman ni dati a House Speaker Martin Romualdez ken pannakabagi ti DPWH ken Ombudsman, idinto nga inkalintegan ni Cayetano a ti pananglapped iti isayangkatda ket mangsinga iti annongen ti Senado ken iti maar-aramid nga imbestigasion.
Iti sabali a bangir, inkalintegan ni Alan Cayetano nga agtalinaed dagiti agdama nga opisial iti Senado, ken isuna latta ti Senate president, ket ni Loren Legarda latta ti Senate president pro tempore. (Dhel Nazario/Manila Bulletin//Lito Hilidon/Bannawag)
