Iti laksid ti agdama a risiris iti Senado, kinuna ti Malakanyang a bigbigenda ti liderato ni Senate President Pro Tempore Sherwin Gatchalian, segun ken ni Undersecretary ti Presidential Communications Office (PCO) Claire Castro ita nga aldaw, Hunio 4.
Kinuna ni Castro nga ania man ti mensahe nga ipatulod ni Gatchalian iti Malakanyang, isu ti bigbigenda a bersion.
Inlawlawag ni Castro a masapul a risuten ti Senado ti bukodda a parikut, ngem ita, ad-adda a bigbigen ti Malakanyang ti panagturay ni Gatchalian, ket raemenda ti desision ti baro a mayoria ti Senado.
Iti sabali a bangir, silulukat ti Malakanyang a mangawag iti special session no kiddawen ti Senado, no la ketdi adda nadagsen a rason a maangay ti special session.
Sakbay daytoy, kinuna ni Gatchalian a pampanunoten dagiti senador no kasapulan nga isayangkatda ti special session tapno tamingenda dagiti nakapila a gakat a linteg kasta met kadagiti appointment a naitantan gapu iti risiris iti liderato ti Senado. (Betheena Unite/Manila Bulletin//Lito Hilidon/Bannawag)
