Sarita ni GREGORIO BERMUDEZ
NAKULLAAPAN ti panunotko. Diak nalapdan ti riknak. Rinakepko ni Seny ket minalditak dagiti bibig, pingping, agong, muging ken teltelna kadagiti agekko. Pinadasna ti agkedked, ngem saan a nakapagtagari. Iti sam-it dagiti darikmat, nalipatak nga addakami iti nabulbulod a kanito.
Naglawag ti balay!
Inibbatak ni Seny. Ngem naladawen. Naduktalankamin. Kasla kumilaw dagiti mata ni Tata Beriong a naiturong kadakami.
“Mangliliput!”
KLASIKO A SARITA: Atang (1)
Nagallangogan ti timekna, awan pay kaes-eskan ti pigsa ti timek ti baket nga erbolario uray pay itay ipempennekna ti amin a timekna a mangayab kadagiti gagayyemna a di makitkita. Nagtaray ni Nana Candi a napan immarakup.
Inwadag ni Tata Beriong ti asawana. Naiparusisi a kasla awan aniamanna. Nagdanagak. Nalagipko ti kuna dagiti lallakay nga awan makaasping iti pigsa ti maysa nga agmauyong.
Nupay kasta, nagtakderak a sitatalinaay. Diak mapanawan ni Seny. Kinitak. Napalalo ti saibbekna. Nakitak ti panagbuteng iti rupa dagiti amin a sisasango.
Immaddang ni Tata Beriong. Nangngegko ti panagiikkis ket dayta laengen…
NAGBALLIKIDAK. Nariknak ti nasakit iti bakrangko. Nagmulagatak. Idi pay laeng a naglawag ti amin kaniak. Addaak gayamen iti uneg ti balaymi! Nalagipko ti napasamak iti kallabes a rabii.
“Nakariingkan?”
Kinitak ti bangir ti ridaw. Ni Manang Cianing. Adda iggemna a pinggan. Nariknak ti panagbainko. Imbaw-ingko ti panagkitak.
“Nasakit pay laeng?”
Nagwingiwingak. “Ni tatang?”
“Agsarsaritada ken Tata Beriong.”
Pinanggepko ti bumangon.
“Ti la maar-aramidmo ngamin.”
“Diak ammo no ania ti simken kaniak, manang.’’
“Ita, pagassawaendakayon.”
“Ania?”
“Kidkiddawen ni Tata Beriong ti panangitungpalmo ken ni Seny.”
Nasdaawak.
“Adda met ketdi nagsayaatan ti napasamak. Naimbagen ni Tata Beriong. Nagsubli ti limbong ti panunotna gapu iti pannakakellaatna. Ngem sika ti nakakaasi.”
Kinitak ti bagik, dagiti limmitem a nagdissuan dagiti sulong ni Tata Beriong. Kalpasanna, kinitak ni manang.
Immisem.—O
