Inarestar dagiti autoridad ita nga aldaw, Hunio 8, ni contractor Curlee Discaya iti uneg ti Senado, babaen ti bileg ti warrant of arrest nga impaulog ti Malolos Bulacan City Regional Trial Court (RTC) maipuon iti non-bailable a kaso a malversation of public funds mainaig iti naanomalia a flood control project iti Bulacan.
Nakaditenar met ti asawana a ni Sarah Discaya gapu iti isu met laeng a kaso.
Apaman a maarestar ni Curlee Discaya iti Senado, naipan daytoy iti kustodia ti Philippine National Police-Criminal Investigation and Detection Group (PNP-CIDG), sa napan iti Malolos, Bulacan.
Idi Hunio 5, impaulog ti Malolos Bulacan RTC ti warrant of arrest a maibusor ken ni Curlee Discaya, iti asawana, ken siam pay a tattao gapu iti kaso a malversation through falsification of public documents mainaig iti naanomalia a flood control project iti Calumpit, Bulacan. (Hannah L. Torregoza/Manila Bulletin/Lito Hilidon//Bannawag)
