Awan ti maidandanon iti Armed Forces of the Philippines (AFP) nga ania man a pangta iti biangda iti laksid ti naipadamag a posible a panggep a panangrippuog iti gobierno ken panangallukoy kadagiti militar a makibiang iti politika, kasanguanan ti panangrambak ti pagilian iti Aldaw ti Wayawaya (Independece Day) inton Hunio 12.
Kinuna ni AFP Chief of Staff Gen. Romeo Brawner Jr. idi Hunio 8 a nainget ti panangbantayda kadagiti maipadpadamag a pangta mainaig iti panagrali ken ti panggep dagiti grupo ti pasurot ni Bise Presidente Sara Duterte a mangraut iti Malakanyang inton Hunio 12.
Itay kallabes, kinuna ti Malakanyang ken Philippine National Police (PNP) nga awan ti napatalgedan nga impormasion manipud iti intelligence-da mainaig iti maatap a panangraut.
Manaig iti daytoy, ginutigot ni Davao City First District Rep. Paolo “Pulong” Duterte dagiti kameng ti militar nga agtignayda para iti kinapudno ken hustisia iti baet ti isyu ti panagkunniber iti gobierno ken ti riribuk iti Senado, a nangitunda iti pannakaitantan ti pannakakompirmar ti lima a heneral ti militar a naisaad iti nabukel a yunit ti AFP gapu iti saan a pannakaangay ti hearing ti Commission on Appointments (CA).
Ngem impaganetget ni Brawner a saan a makibiang ti militar iti politika nupay buybuyaenda dagiti mapaspasamak iti pagilian. (Martin Sadongdong/Manila Bulletin//Lito Hilidon/Bannawag)
