(MAIKA-11 A PASET)
“NAGSUBANGKAYO kadi i’tay balasang dita bangir, barok?” dinamag ni Tia Caring.
Addakami iti tailoring shop iti dayta nga alas nuebe iti agsapa. Nakasubo iti makinak ti pantalon a pinadait ti maysa a kaeskuelaak a lalaki, aglillilip met ti ikitko. Awan pay dagiti uppat a katulonganna a sastre.
“Kasasaoka, Romeo,” indupagna idi saanak a sumungbat. “Apay a kellaat sa a nagbalinka a tuleng?”
NOBELA: Bastardo (11)
Inunnatko ti siketko. “Sino ti kunkunayo, anti?” kinunak. “Ni Valeriana?”
“’Sino pay ngarud koma? Adda kadi sabali?” Nagkatawa. “Nagsubangkayo la ketdi. Dati, nakasamsam-it a Valerie no awagam. Ita, kasla saan a nalayaan a pinaksiw a Valeriana!”
Saanak a nagtagari.
“Dati, iti kastoy nga oras, awankan ditoy balay,” intuloy ni Tia Caring ti litaniana. “Addakan dita bangir a makiganggantil. Ngem ita, nadlawko nga addaka lattan a pasalsali ditoy. No diak agriro, masuroken a makalawas.”
“Ni anti met,” kinunak. “Adu la a madmadlawyo.”
“Nakaddidillaw ngamin,” kinunana. Sa nagkatawa manen. “Nagsardeng metten ti isasangpet ti padigo. Sigsigud, agsangpet ti malukong ditoy. Siak ti para raman kadagiti potaheda. Ngem ita, nasuroken a maysa a lawas nga awan ti uray maysa a malukong a sumangpet, uray la koma naalsem a dinardaraan. Kasta met a kasla likliklikannakon ni Sianang. Sika la ketdi ti gapuna, ‘nia?”
“Apay koma a siak?” Pinasarunuak iti nalab-ay a katawa. “Siguro, saandakon a kayat a manugangen, ‘su a kastadan. Naalada siguron ti kaykayatda kaniak!”
“Adda maang-angotko a kasla ginelgel a baraniw,” kinuna ketdi ni Tia Caring. “Apay, ania ti inaramidmo idi napankayo nagbuya ken Valerie iti sine, ha?”
“Awan, anti,” kinunak. “Ania koma ti aramidek... wenno maaramidak? Naipanurok ti kinasupladana. Masagidko la ti kikitna, awan dumanan iti ampo ti pasgarna. Dina pulos ik-ikkan wenno ibabainan ti tao.”
“Ket?”
“Basta saanko lattan a kinasarsarita manipud idi nagbuyakami iti sine. Panagkunak, saan a siak ti lalaki a para kenkuana.”
Nagkatawa ni Tia Charing. “Wenno kastaka itan gapu ta— ‘nia itayen ti kinunam— naalamon ti kaykayatmo, ha?”
Manen, nagkatawaak iti nalab-ay. “Suplada ngarud, anti,” kinunak. “Awan a pulos ti mabalin a pangabrutan iti puonan. Lugi bagas, agraman tuyo.”
“Dimo siguro ammo ti agdingo iti burias,” kinuna ti ikitko. “Ammom kadi no sadino a paset ti bagi ti burias ti kudkoden no kayatmo nga agilad daytoy?”
Nagmalangaak. “Saan, anti,” inyakok.
“Dayta ngarud ti takuatam. Ngem naladaw siguron ti amin, no pudno nga awankayon.”
“Siak a biang, awanen, anti. Ken kua, saanko man a kayat ti agkudkod iti burias!”
“Sayang ti padigo!” inlingaling ni Tia Caring a napnuan kaipapanan ti isemna. “Sayang ti kaldo!”
Saanak a nagtimek. Saan metten a nagtagari ni Tia Caring ta simmangpeten dagiti sastrena.
KALKALPASMI a nangaldaw. Agpalpalpaak iti yan ti makinak iti tailoring shop idi sumrek ni Dodoy, ti maysa kadagiti sastre ni Tia Caring. Aging-ingat.
“Adda lab letirmo, bay,” kinunana kaniak apaman a nakastrek.
“’Nia a lab letir?” tinuladko ti panagbalikasna.
“Naggapu dita karinderia dita bangir, bay,” kinautna ti bolsa ti polo shirt-na. Nakasobre iti puraw ti inyawatna kaniak. “Inted ni may labsmo.”
Nagkatawaak iti kawaw. Inawatko ti sobre. Masansan nga iti karinderia da Valerie— Valeriana— a mangal-aldaw dagiti sastre ni Tia Caring.
Inkabilko ti surat ni Valeriana iti maysa kadagiti kahon ti makina a pagdait nga us-usarek.
“Ne, saanmo kadi a basaen, bay?”
“Inton madamdama,” kinunak. “Masadutak nga agbasa iti surat.”
“Kasta?”
“Wen. Adda met selponna. Ammona ti numero ti selponko. Apay a dinak pay la tawagan? Apay nga agsuratsurat pay laeng? Kornin ti suratsurat itoy a tiempo.” Ngem napaisemak ta nalagipko daydi suratko ken ni Valerie.
Nagkatawa ni Dodoy. “Siguro, awan ti load-na, bay.” Pinasarunuanna daytoy iti katawa. “Amangan no ur-rayenna nga i-pasaload-mo!”
Kinatawaak iti apagapaman ti angawna. “Uray siak, awan met ti load-ko,” kinunak. “Ur-urayek met ti pasaload-na.”
Iti sumuno nga aldaw, nakaawatak iti mensahe manipud ken ni Valeriana iti selponko. Saankon a binasa ti linaonna. Iniddepkon ti selpon idi makitak nga isu ti naggapuan ti text message.
Nagtalinaed iti kahon ti makinak a pagdait ti surat ni Valeriana. Saanko a pulos a naammuan ti linaonna.
Iti maysa nga agsapa, impisokko ti surat iti pagbasuraan.
ALAS dos iti malem. Nakarubuatakon a sumrek iti unibersidad. Dimmagasak iti apagbiit iti tailoring shop ta adda innalak iti maysa a kahon.
Rummuarakon iti shop idi awagannak ni Dodoy. Inabaynak iti ruar ti ridaw. Kinissiimannak.
“Adda bilin ‘tay tsiks dita karinderia, bay,” kinunana.
“Ania?”
“Dagasem kano no rummuarka.”
“Apay?”
“Agkuyogkayo kano a sumrek iti iskul.”
“Kinunana dayta?”
“Wen, bay.”
Nagpanunotak. Idi kuan, kinitak ti relok. “Maladawakon,” kinunak. “Ibagam kenkuana nga inton maminsan laengen. Agdardarasak.”
Minulenglengannak ni Dodoy. Manutsutil ti isemna. “Madlawko, kasla liklikam isuna,” kinunana. “Naumaka kadin kenkuana, bay?”
“Saan man la a ti bibiangam,” kinunak. “Ngem, agurayka... saanak a nauma, bay. Ti makunak, adda laeng ramen a kurang iti bibingka ni Valeriana. Agkurang ‘ti sam-itna!”
Saanen a nagtagari ni Dodoy. Namrayanna ti nangkudkod iti teltelna.
Namitlo a pinanggep ni Valeriana ti makisao kaniak; tallo a gundaway met a pinaayko. Apay koma a kasaritak? Natakuatak a nagpusasawen ti dati a nariknak a para kenkuana. Kaarngi daydiay dagiti basikaw iti danum ti dan-aw a pinarnuay ti naibato a bisil. Idi agpukaw dagita a basikaw, naglumen metten ti essem a marikriknak.
Adda gapuna dayta. Naam-ammok ti maysa a dayag nga agnagan iti Maria Celestina.
(Maituloyto)
