Nagpaayab ni Presidente Marcos Jr. iti special session ti Kongreso inton Hunio 17 tapno mataming dagiti prioridad a paglintegan a mangpatibker iti social protection, mangpasaknap iti pannakagun-od ti edukasion ken pannakataripato ti salun-at, ken mangipaay iti tulong kadagiti nakurapay a Filipino iti baet ti mapaspasamak a parikut iti enerhia ken kallabes a natural a rekursos.
Babaen ti Proclamation No. 1318 a pinirmaan ni Presidente Marcos ita nga aldaw, Hunio 15, binilinna dagiti mammanday-linteg a tamingenda dagiti prioridad a gakat a paglintegan a nakapila latta nupay dandanin mairingpas dagitoy.
Sumagmamano kadagiti gakat a masapul a mataming ti pannakabangon ti National Center for Geriatric Health, pannakaamendar ti Government Assistance to Students and Teachers in Private Education (GASTPE) Act, ti singasing nga Assistance to Individuals in Crisis Situations (AICS) Act, ken pannakaamendar ti Universal Access to Quality Tertiary Education Act.
Malaksid iti pannakabukel ti linteg, mairaman kadagiti tamingenda iti special session ti pannakakompirmar dagiti nadutokan a pagsaadan iti gabinete, militar, ken serbisio kadagiti adda iti ballasiw-taaw.
Kas maitunos iti Section 15, Article VI ti 1987 Constitution, mabalin nga agpaayab ti presidente iti special sesssion iti ania man nga oras tapno mataming a dagus dagiti kasapulan a maanamongan a paglintegan. (Argyll Cyrus Geducos/Manila Bulletin//Lito Hilidon/Bannawag)
