Ti LGU Santa, Ilocos Sur, saan la a mangipaay iti scholarship kadagiti nasisirib nga annak ti ili no di ket tarayaben ken suportaranna pay dagiti agturpos nga agbalin a naan-anay a propesional babaen ti panangipaayna iti tulong pinansial iti panag-review dagitoy iti panageksamenda iti civil service.
Ti special grant ket paset ti maisaysayangkat a programa ti LGU Santa a mangtulong kadagiti agtutubo babaen ti pannakaipaay ti gastosenda para iti mapasungad a July-December 2026 Licensure Examinations. Kinuna ni Mayor Bueno a maipannakkel ti dedikasion dagiti agtutubo a manggun-od iti arapaapda.
Mainaig itoy, impakaammo ni Mayor Bueno a kadagiti saan a nakakamakamat iti deadline, mabalinda ti kumamakam iti BEST Program agingga no Biernes, Hunio 19, 2026. Pasiarenda laeng ti munisipio para iti ad-adu pay nga impormasion. (MARILYN CORRALES-CONTILLO)
