Produktibo ken balligi ti inrusat ti Itag-ayka Quinarayan Multi-Purpose Coop. (IQMPC) a soil conditioner production babaen ti vermiculture wenno alinta nga agpatanor iti ganagan.
Pinundar ken idadauluan ita ni Engr. Reynaldo P. Canto, ti IQMPC ket agparpartuat iti organic soil conditioner nga umab-abot iti aganay a 500 kilogramo iti binulan manipud pay idi Abril. Umad-adu ti agorder iti organiko a ganagan gapu ta napaneknekandan ti kinasayaat ti produkto ti IQMPC.
Kas kinuna ni Engr. Canto, agtultuloy ti panangpasayaatda iti produktoda nga organiko a ganagan tapno ma-upgrade daytoy ken tapno maikadakkel pay ti produksion tapno masuplayanda dagiti agkasapulan. Iti agdama, saan laengen a dagiti mannalon iti Narvacan no di pay dagiti taga sabali a lokalidad ti agor-order iti produktoda a soil conditioner ken organic fertilizer.
Inlawlawag ni Engr. Canto a kasapulan ti sertipikasion ti maseknan nga ahensia ti turay tapno agbalinton a naan-anay nga organiko a ganagan ti produktoda.
“Ti imanmanehartayo a vermicomposting facility, addaan iti maaw-awagan iti16 flat soil beds a pakataraknan dagiti alinta a mangpatanor iti organic soil conditioner ken 3 a para iti pre-decomposting beds (PDB),” kinuna ni Engr. Canto.
SANTALENTADO 2026: Beat the Risk, isayangkat ti LGU Santa
Mainaig itoy, impeksa ni Engr. Canto ti panagyamanna iti gobierno lokal ti Narvacan, iti panangidaulo ni Mayora Edna Cabalo Sanidad, DMD, gapu iti naan-anay a suporta nga impaayna iti pannakabangon ti pasilidad, agraman ti pannakalinong daytoy. Nagyaman pay iti Department of Agrarian Reform iti panangipaayna iti P500,000 a nagastos iti pannakabangon ti pasdek ti vermicomposting facility, ken iti Cooperative Development Authority a nangipaay met iti P50,000, iti Ilocos Sur Provincial Agriculture Office ken iti Department of Trade and Industry iti teknikal a suportada.
Mapatanor ti soil conditioner ken organiko a ganagan babaen ti panagaramat kadagiti biodegradable materials kas kadagiti maurnong a takki dagiti dinguen kas iti baka ken nuang, a malaokan kadagiti malusak a bulong dagiti kayo ken ruot a maala iti aglawlaw. Kadua ni Engr. Canto ni Ariel Tadeo iti pasilidad ngem mangtangdanda iti kaduada no adu ti order a ganagan a nasken a maikamakam. (ELISEO B. CONTILLO)
