Indeklarar ti Malakanyang a kas special non-working holiday iti Siudad ti Manila inton Mierkoles, Hunio 24, kas panangrambak iti maika-455 a tawen ti pannakaibangon ti siudad, maibasar iti Proclamation No. 1320 a pinirmaan ni Acting Executive Secretary Ralph Recto idi Hunio 16.
Segun iti Manila Public Information Office, ipaay ni Manila Mayor Francisco "Isko Moreno" Domagoso ti State of the City Address (SOCA) iti Quirino Grandstand iti dayta nga aldaw.
Ti Hunio 24 ti pannakarambak ti Manila Day, a panglagip iti pannakaibangon iti Siudad ti Manila babaen ken ni Miguel López de Legazpi idi Hunio 24, 1571, a namagbalin iti Manila a maysa kadagiti kadaanan a siudad iti pagilian, ken ti taeng ti politikal a bileg idi panawen dagiti Kastila. (Argyll Cyrus Geducos/Manila Bulletin//Lito Hilidon/Bannawag)
