Saan nga us-usaren ti Malakanyang ti International Criminal Court (ICC) a maibusor kadagiti kalabanda iti politika, idinto a Filipino met laeng ti nangisaklang kadagiti kaso iti internasional a korte idi pay 2017.
Daytoy ti sungbat ni undersecretary ti Presidential Communications Office (PCO) Claire Castro ita nga aldaw, Hunio 18, iti sinao ni Davao City 1st District Rep. Paolo Duterte nga us-usaren ti administrasion ti ICC tapno maawan dagiti kasalisalda iti politika, nangruna idi rimsua ti report a nangipaulogen ti ICC iti arrest warrant kontra kada Sen. Christopher "Bong" Go ken dua a dati nga opisial ti polis.
Inlawlawag ni Castro a saan a rumbeng nga ipabasol dagiti Duterte ti kasoda iti administrasion, idinto nga idi pay 2017 a naipila dagitoy, ket kayatda laeng dagiti nangidarum a magun-od ti hustisia.
Itay kallabes, impaskil ni Rep. Duterte iti Facebook account-na nga addan inruar ti ICC nga arrest warrant kontra kadagiti nadakamat a personalidad.
Impaganetget ti Malakanyang nga ania man a tignay a mainaig iti proseso ti ICC, tamingenda kas maitunos iti paglintegan ti Filipinas ken legal a proseso. (Argyll Cyrus Geducos/Manila Bulletin//Lito Hilidon/Bannawag)
