Naipan iti Tropical Cyclone Wind Signal (TCWS) No. 1 ti sumagmamano a paset ti Northern Luzon gapu iti Bagyo Francisco (internasional a nagan: Mekkhala), segun iti Philippine Atmospheric, Geophysical and Astronomical Services Administration (PAGASA) ita nga aldaw, Hunio 22.
Maibatay iti waragawag ti PAGASA itay 5:00 iti parbangon, adda iti TWCS No. 1 ti probinsia ti Batanes, amianan a daya a paset ti Cagayan (Gonzaga, Santa Ana) agraman ti daya a paset ti Babuyan Islands (Babuyan Is., Didicas Is., Camiguin Is.)
Agpigsa ni Francisco iti 140 a kilometro kada oras iti asideg ti sentrona, ken pugso nga agingga iti 170 a kilometro kada oras.
Itay 4:00 iti parbangon, adda ni Francisco iti 715 a kilometro iti daya ti Tuguegarao City, Cagayan, ket agpalaud-amianan a laud iti kapardas a 30 a kilometro kada oras.
Segun iti PAGASA, posible nga agtalinaed ni Francisco iti Philippine Sea, nupay adda latta posibilidadna nga agbaliw ti turongen daytoy ket umasideg iti ngudo ti amianan a Luzon. (Ma. Cristina Arayata/PNA//Lito Hilidon/Bannawag)
