Indauluan ni Santa Mayor Atty. Jeremy Jesus DP. Bueno III ti naiwayat a napagtipon a tarpinong ti Local School Board (LSB) ken ti Municipal Disaster Risk Reduction Management Council (MDRRMC) tapno mapagsasaritaan dagiti kabarbaro nga alagaden nga impaulog ti Department of Education (DepEd) tapno mayadal no ania dagiti nasken nga aramiden no adda dagiti sumangbay a kalamidad iti pagilian a mangapektar iti lokalidad nangruna itoy nga isasangbay manen ti panaglalayus ken iti agsasaruno a mapaspasamak a ginggined iti pagilian.
Naiwayat ti taripnong idi Hunio 15, 2026, inatendaran daytoy dagiti amin a maseknan nga opisial, nangruna dagiti mangidaulo ken kameng ti LSC ken MDRRMC.
Tapno maidanon iti sapasap ken maipakaammo dagiti napapateg a baro nga alagaden nga impaulog ti DepEd, naawis pay a nagatendar dagiti kameng ti konseho ti ili, dagiti opisial ti barangay nga idauluan dagiti Punong Barangay, ken dadduma pay a maseknan nga opisial.
Inggunamgunam ni Mayor Bueno a nasken ti nagkaysa a tignay tapno maisigurado a naan-annayas dagiti maiwayat nga addang kas mayanurot kadagiti sagudayen dagiti maipatungpal nga addang tapno mapagtalinaed a natibker ti sektor ti edukasion ken natalged dagiti agad-adal, ken agbalin pay a proactive ti komunidad. (MARILYN CORRALES-CONTILLO)
