(MAIKA-12 A PASET)
DOMINGO. Nasipnget pay laeng, nakarubuatakon. Adda ekskursionmi kadagiti sumagmamano a kaeskuelaak. Dar-ayanmi ti kasangay ni Rachelle, kabsat ti maysa a kaeskuelami a babai, nga adda beach resort ti pamiliada iti Nasugbo.
Saan pay a nakalgak ti init nupay nalawagen ti aglawlaw idi makagtengak iti sanguanan ti main bulding ti unibersidad a nagtutulaganmi a pagiinnurayan. Adda van a mangsukon kadakami. Sangadosenakami a nagrubuat. Agarup alas sieten ti agsapa idi aggunay ti lugan.
NOBELA: Bastardo (11)
Nadalus pay ti danum ti beach resort da Rachelle. Panglawaen. Naipattopattok ti agsangapulo ket dua ngata a cottage ken picnic shed iti pangwalaten a kadaratan. Nadatnganmi nga addan nangupa kadagitoy. Kaaduan kadagitoy ti agpisawpisawen iti baybay. Nupay kasta, naireserba kadakami ti kadakkelan a cottage.
Adda dagiti maupaan a balsa nga adda kalapaw ken lamisaan iti tengnga a naitapogen iti apgad, ken uray met dagiti babassit a rakit a nabalawbawan laeng. Kinuna ni Rachelle a mabalinmi latta nga isalog iti danum dagitoy no kayatmi ti agnunog iti baybay.
Awan dumami iti ikan a nagpisawpisaw iti pagatbarukong nga apgad iti paset a di unay adayo iti takdang. Agkikinnamat. Agsisinnayyo. Agbatokbatok. Agiinnalaan. Adda nangitugot iti bola, nagaayamda iti water volleyball. Sa laeng timmakdangkami idi mayayab ti pangngaldaw.
Nalabon ti sagana a kaaduanna nga apit manipud iti baybay. Nadumaduma a klase ti ikan, laki, seaweeds. Adda tinuno. Adda sinigang. Adda sinaing. Adda kilawen. Adda pay insarabasab a lumo ti baka. Letson a baboy. Barbecue. Inanger a barawas ti baka a dinagasmi a ginatang iti Tagaytay. Dimo ammo ti kayatmo a piduten. Nagayus met ti softdrinks, lambanog, serbesa ken uray pay brandy ken whisky. Sagana daytoy ti maysa a reyna, indayaw ni Ferdie Manzano a puon ti nagkuddotan ni Rachelle, ti agkasangay, iti barukongna.
Bakit naman kurot lang? inreklamo ni Ferdie. At sa tapat pa ng puso!
Manigas ka!
Agarup kataebmi met laeng ni Rachelle. Seksi iti insuot daytoy a two-piece.
Kinissiimak ni Ferdie. “Iti kasta a mangrugi ti amin, pards,” kinunak.
“Saanak a bagay, pards,” kinuna met ni Ferdie.
“Apay a saan?”
“Diak kabaelan ti kastoy a panagsagana. Agbalinak nga agpalpalama a dina oras!”
Inipusak dayta iti katawa.
IMPALDAGKO ti bussogko. Agarup maalakon ti ridepko idi maallingagko ti kasla ariwawa ti maysa a babai iti medio adalem a paset ti baybay. Bimmaringkuasak. Nariparko ti maysa a naka-bathing suit a babai a kulagtit a kulagtit iti rabaw ti maysa kadagiti babassit a balsa. Agpapaarayat.
Nakamalanga lattan ti kaaduan kadagiti ekskursionista. Kinitak ti nangato a pagtugtugawan ti life guard. Adda met itay dita ti lalaki nga agbambantay kadagiti agtantaneb iti baybay, apay nga awan itan?
Ginutadnak ti peggad. Ammok met bassit ti bumatok. Nalaingak nga agpana iti katangriban idiay ilimi no kasta a bakasion.
Insalogko ti maysa kadagiti babassit a balsa iti takdang, napartak ti panagtekkenko. Di nagbayag, nakaasidegakon iti balsa a yan ti babai nga agik-ikkis.
“Apay, miss?” dinamagko. “Ania ti napasamakmo?”
“Saan a siak!”
“’Sino?”
“Ni Tintin!” Intudona ti uneg ti danum iti kanawan a sikigan ti balsa. “Nagbetted ti sakana... nalmes sa metten, Apo! Alawem! Alawem!”
Inanninawak ti uneg ti danum. Idi kuan, nakitak ti eye goggle iti rabaw ti balsa. Insuotko a dagus daytoy. Timmapuakak iti danum.
Nalabes a pagattao ti kinaadalem ti danum. Iti lansad, nakitak nga awanen ti puot ti babai. Iniggamak ti kanigid nga imana sa inkuy-atko nga intallapaw.
“Awatem ti imana!” kinunak iti babai iti balsa. “Iggamam a naimbag, Saanmo nga ib-ibbatan!”
Nagtungpal. Dinagdagusko met ti simmalpa iti balsa. Ingguyodko ti inalawko—nakabikini ken nakabra laeng— nga insalpa iti balsa. Inaramatko ti bassit nga ammok maipapan iti first aid. Kalpasanna, pinakatak iti mouth-to-mouth resuscitation. Nagareng-eng. Imbakuarna ti danum ti apgad.
“Thank you, God!” kinuna ti kaduana idi makapuot ti inalawko a babai. “Kunak no nalmeskan, Tintin!”
Inuraymi nga agsimbeng ti rikna ti inalawko a babai. “Okeykan, misis?” dinamagko idi agangay.
Nagtung-ed a nangkita kaniak ti babai. “TY, Mister....”
“Romeo no awagandak dagiti gagayyemko,”inyisemko. “Ngem awagannak lattan iti Ardi, misis. Inisial dayta ti naganko.”
“RD!” kinuna ti kadua ti babai nga inalawko.
“Utangko kenka ti biagko.”
“Awan aniamanna, misis,” imparimrimko.
“Ano ka?” inkusilap ti babai. “Miss pa po ako!”
Naammuak nga eskursionistada met a kas kadakami. Wen, estudianteda iti maysa nga unibersidad iti Manila. Awan ti agkasangay iti grupoda, basta nagtutulagda nga agekskursionda ditoy. Limada nga agkakadua, awan ti lalaki. Ammona kano met ti aglangoy—langoy-aso, kinunana. Adda kano signosna iti danum, impagarupna a pumudno daytoyen itay agbetted ti kanigid a gurongna.
“Wen gayam,” kinuna ti kaduana a babai a nagpaarayat. “Siak ni Charisse. Wenno Isang lattan. Classmate-kami a dua. Talaga a diak ammo ti aramidek itay. Naunaannak ti nerbios. Numona ta diak met ammo ti aglangoy!”
“Siak met ni Tintin,” inyam-ammo ti inalawko ti bagina.
Dayta kano ti yaw-awag dagiti gagayyem ken kapaspasiganna. Maria Celestina Recuerdo ti pudpudno. Idiay balayda, Marie, Maricel wenno Tina.
Minulenglengak. Iti laksid ti kinabessagna pay laeng gapu iti napasamakna, adda pamuyaan ni Maria Celestina. Ken saan a basta pamuyaan, no di pay ket kinapintas a mabalin nga ipagtangsit ti asino man a lalaki a makarelasionna. Agtawen iti apagtapog a sangapulo ket siam, inaudian iti dudua nga agkabsat a lalaki ken babai.
“Para kaniak, sika ni Tina,” kinunak. “Adu kadi ti mangaw-awag kenka iti kasta, malaksid idiay balayyo?“
Naglingaling . “Sika laeng,” kinunana. “Apay a Tina?”
“Agsipud ta ita nga aldaw,” kinunak, “tininam ti barukongko iti maris-rosas.”
Nakasamsam-it ti isemna. Kineddelna ti kanigid a takiagko iti napino. Nasakit ngem inturedko.
“Panagkunak, naungarankan,” inyisemko. “Ammomon ti kumeddel!”
Immisem ni Tina idinto a nagkatawa ni Isang.
Inggalutko ti balsa da Tina ken Isang iti nagluganak a balsa. Siakon ti naggaud nga agturong iti takdang. Iti takdang, kaaduanna ti nakatengngaag kadakami.
Kinibinko ni Isang, sa ni Tina kalpasanna, iti ididissaagda iti balsa apaman a simmadsadkami iti kadaratan. Ngem uray idi bumaddekkamin iti kadaratan, inggagarak a di inibbatan ti dakulap ni Tina.
Saanna nga imbabawi ti imana. Kellaat, adda nariknak a naisangsangayan a sikaw iti pus-ongko.
(Maituloyto)
