Tallo nga estudiante ti nakompirmar a napapatay, idinto a pito ti nadangran, gapu iti napasamak a pammaltog iti San Jose National High School iti Siudad ti Tacloban idi Hunio 22.
Nangngegda ti sumagmamano a kanalbuong bayat a maang-angay ti klase, a nangpataud iti buteng ken pannakariribuk dagiti estudiante ken mannursuro.
Segun iti polisia, dua a tao ti maibilang a person of interest iti napasamak, a naammuan nga agtawen iti 15 ken 14, nga agpada nga addan iti Grade 9.
Impasigurado ti Police Regional Office-8 (PRO-8) iti publiko nga ar-aramidenda ti amin para iti nadaras a pannakakemmeg ti maysa pay a suspek ken agtalinaed ti kinatalged ken seguridad ti publiko.
Dinagadag ti PRO-8 ti publiko nga agtanangda koma, saanda nga agiwaras iti saan a napatalgedan ng impormasion, ken tumulongda iti autoridad babaen ti panangtedda iti ania man nga impormasion a makatulong iti panagimbestigarda.
Signal 1, naibayog iti 12 a lugar iti Luzon gapu ken ni Bagyo Kiyapo
Natiliwda a dagus ti maysa a suspek nga anak ti soldado, a maibilang a Child In Conflict with the Law ken residente ti Barangay San Jose itoy a siudad.
Iti operasion nga insayangkat ti PRO-8, nakemmeg ti maysa pay a suspek a menor de edad met laeng.
Naalada kadagiti suspek ti 9mm pistol ken caliber 38 a mapapati nga inusarna iti panangpaltog iti eskuela.
Segun ken ni hepe ti Tacloban City Police Col. Noelito Getigan, panang-bully ti mapapati a makaigapu iti panagpaltog dagiti suspek. (Marie Tonette Marticio/Manila Bulletin//Lito Hilidon/Bannawag)
