Binilin ti Office of the Ombudsman (OMB) da Senador Alan Peter Cayetano ken Robin Padilla, agraman ni dati a Senate sergeant-at-arms Mao Aplasca, a sungbatanda ti kaso nga obstruction of justice nga impila ti gunglo a Tindig Pilipinas maipuon iti panaglibas ni Senador Ronald “Bato” dela Rosa iti Senado idi napan a bulan.
Iti impaulog a pammilin ti Preliminary Investigation, Administrative Adjudication, and Monitoring Office (PAMO) ti Ombudsman, binilinna dagiti naidarum a mangisubmitar iti counter-affidavit-da nagraman ti ebidensia iti las-ud ti saan a mayalud-od a 15 nga aldaw manipud pannakaawatda iti pammilin.
Segun iti Ombudsman, no saan a makatungpal dagiti naidarum iti naituding a tiempo, risutendan ti kaso ken saandan nga awaten iti ania man a kiddaw wenno dokumento mainaig iti kaso. (Ellalyn De Vera-Ruiz/Manila Bulletin//Lito Hilidon/Bannawag)
