Panggep ni Presidente Marcos Jr. a buklen ti free trade agreement (FTA) ti Filipinas ken Canada iti isasarungkarna iti Canada inton umay a lawas, kas panangpatibker iti rumusrusing a panagasmang ti dua a pagilian iti benneg ti ekonomia ken seguridad.
Inwaragawag ni Canadian Prime Minister Mark Carney a sarungkaran ni Marcos ti Vancouver, British Columbia manipud Hulio 1 agingga 4, ti umuna a panangsarungkar ti pangulo ti Filipinas iti Canada iti las-ud ti 11 a tawen.
Adalen ti dua a pangulo ti pagilian dagiti gundaway a mangpatibker iti relasion ti Filipinas ken Canada, agraman ti pannakabukel ti Philippines-Canada FTA ken ti Canada-Association of Southeast Asian Nations (ASEAN) FTA.
Ti Canada ti yan ti dandani maysa a milion a Canadian a tubo ti Filipinas, ti kadakkelan ken dumakdakkel a komunidad ti pagilian. (Argyll Cyrus Geducos/Manila Bulletin//Lito Hilidon/Bannawag)
