Inwayat ti Local Government Unit (LGU) Santa, Ilocos Sur, babaen ti Santa Municipal Disaster Risk Reduction Management Office (MDRRMO), ti joint inter-agency inspection tapno mairingpas ti rehabilitasion dagiti kritikal a proyekto a para iti impraestruktura a dinadael da Bagyo Emong ken Bagyo Uwan.
Naisentro ti estratehiko nga addang iti pannakaisayangkat ti napardas nga aksion para iti dua a maibilang a napeggad a lugar: ti naapektaran a seawall iti Barangay Magsaysay ken Quezon; ken ti structural integrity ti Calungboyan Bridge.
Tapno masigurado ti napardas nga aksion, direkta a nakitulag ti LGU Santa iti Deparment of Public Works and Highways (DPWH) Ilocos Sur 2nd District Engineering Office, iti Provincial Engineering Office, ken kadagiti opisial dagiti maseknan a barangay.
Kinompirma ni District Engineer Neil Farala a makatulong dagiti makalapda a datos iti maiwayat a teknikal a panangtingitingda kadagiti nasao a proyekto, tapno maisagana ti napardas a pannakatarimaan dagitoy, nangruna ti engineering intervention.
Iti pannakiuman ni Santa Mayor Atty. JJ Bueno III ken ni Barangay Captain Benedicto Cardenas, kangrunaan a napagsaritaanda ti panagbinnuyog dagiti ganuat ken rekursos ti lokal ken nasional a gobierno tapno maisigurado ti kinatalged dagiti umili iti panawen ti kalamidad, nangruna kadagiti agindeg iti igid ti karayan ken baybay. (MARILYN CORRALES CONTILLO)
