Indilig ni House Deputy Speaker La Union 1st district Rep. Paolo Ortega V ti kaso nga impeachment ni Bise-Presidente Sara Duterte ken iti kaso ti public school teacher a ni Ronnel Mas.
Naarestar ni Mas idi 2020 gapu iti imbagana iti social media nga ikkanna ti ₱50 a milion ti asino man a makapapatay ken ni Rodrigo Duterte a presidente idi.
Idi agangay, dimmawat ti dispensar ni Mas ket kinunana nga angaw laeng ti imbagana.
Segun ken ni Ortega, rumbeng a maipakat ti isu met laeng a pangrukodan iti kasasaad ni VP Duterte idi imbagana nga addan kinasaritana a mangpapatay iti Presidente Marcos, First Lady Liza Araneta-Marcos, ken dati a House Speaker Martin Romualdez, no bilang ta mapapatay daytoy.
Iti isu met laeng a video, kinuna ni VP Duterte a saan nga ang-angaw dagiti imbagana.
Pannakaiparang dagiti dokumento iti banko, buis, ken AMLC ni VP Duterte, inanamongan ti impeachment court ti Senado
Dakdakamaten ni Ortega ti depensa dagiti abogado ni Duterte a paset ti wayawaya iti panagsao (freedom of speech) dagiti insawang ti bise presidente a pangta.
"No ti gagangay a mannursuro, nagkuna a mangted iti ₱50 a milion tapno mapapatay ti presidente, ket maarestar, apay nga ibilang a 'free speech' ti imbaga ni VP Duterte nga addan kinasaritana a mangpapatay iti Presidente, First Lady, ken Speaker?" kinuna ni Ortega.
Ni Ortega ti nangyendorso iti maysa kadagiti uppat nga impeachment complaint a naipilia kontra iti bise presidente ita a tawen. (Ellson Quismorio/Manila Bulletin//Lito Hilidon/Bannawag)
