Sarita ni CRISOSTOMO M. ILUSTRE
Kabigatanna, idi ibuangko ti abulog, ti laeng burik a pamusian ti saan nga agaliwaksay.
“’Tang, agkukurrot ‘toy maysa a manok,” kinunak.
Inungap ni tatang ti sippit daytoy idi saan laeng a tumuktok. Nagtibbayoak. Naglibas ti dara iti rupak.
“Addan sa man ket sakit dagiti manoken,” kinunana.
KLASIKO A SARITA: No Kasta…? (1)
Nakaangesak iti nalukay. Kunak la no maduktalannakon!
“Ipupokmo ta di ket makaakar,” kinuna ni tatang.
“Sidaentayon, a.”
“Sika met. Dayta la tianmo ti ammom! Ala, pakanem iti nasam-it bareng maimbagan.”
Iti umaldaw, sinarungkarak ti impupokko. Kimmaro ti panagmamayona. Nakadumog latta. Agsipud ta awan manen ti makasiput kaniak, impakatkon ti sumaruno nga addang. Tiniritirko ti tengnged ti manok. Awan pay ti arimekmekna!
Idi dimteng ni tatang, nagimpapapanak manen iti sagumbi. “Ne, natayen ‘toy manok!” impukkawko.
Agwingwingiwing ni tatang idi imbagana nga ikalikon ti manok.
“La-la-rin! Larin!” inkantak kabayatan ti panagturongko iti balay da Paran.
Tinunomi a dagus ti manok. “Makitam?” kinuna ni Paran idi naalunosmin ti tinuno.
Kalpasan ti nasurok a makabulan, piniduak nga inwayat ti “Operasion Agkukurrot.” Inagasan pay ni tatang ti napilik a pinagkukurrot. Ngem aniat’ mamaayna?
Binaybay-ak nga isuda ti makaduktal iti binekkelko.
“Nabiit pay laeng, adda man sakit ti manoken,” kinuna ni tatamg idi bittatayennan ti manok. Isun ti napan nangikali. Ngem mabalin, aya, a saan nga agtungpal kaniak! Siniimko ti nangikalianna. Ket idi awanen ti namnamaek a makakita kaniak, kinutkotkon ti manok. Kalpasan pay ti sumagmamano nga oras, mabalin manen a pagilig-isan iti kuto ti tianmi ken Paran.
Saanko a sinunotan ti aramidko iti uneg ti dua a bulan. Agdillawdan no kanayon nga adda agkukurrot, kinunak idi iti nakemko. Ken maysa pay, saanak met unay nga aggagar nga agsida iti manok ta masansan met nga adda maatalan.
Nabayag koma a saanko a sinunotan ti ipakpakatko a sirib no saannak nga inungtan ni tatang iti naminsan a pannakaliwayko a mangpakan iti baudna a maisen. Saan koma met a nasakit ti nakemko no unget laeng ngem adda pay pasurotna a baut idi nagtanabutobak. Agaluadkayo a manok, a, agaluadka a baud, impangtak iti unegko.
Ania, aya, ti kaykayat ni tatang? Ti saan a pannangan ti manokna iti maminsan wenno ti pannakaaroskaldo daytoy?
(Adda tuloyna)
