Nagbalin a bagyo ti low-pressure area (LPA) iti laud ti Central Luzon ita nga aldaw, Hulio 1, ket napanaganan daytoy iti Bagyo Henry, segun iti Philippine Atmospheric, Geophysical and Astronomical Services Administration (PAGASA).
Nasaripatpatan ti PAGASA ni Bagyo Henry iti 115 a kilometro iti laud-abagatan a laud ti Abucay, Bataan, nga agpigsa iti 45 a kilometro kada oras iti asideg ti sentrona, ken pugso nga agingga iti 55 a kilometro kada oras.
Agpaamianan a laud ti bagyo iti kapardas a 25 a kilometro kada oras.
Maibasar iti waragawag ti PAGASA itay 5:00 iti parbangon, adda iti Tropical Cyclone Wind Signal (TCWS) No. 1 iti abagatan a laud a paset ti Zambales (San Antonio, Castillejos, Subic, ken Olongapo City), laud a paset ti Bataan (Morong, Bagac, ken Mariveles), ken ti Lubang Islands.
Iti sabali a bangir, agtudo kadagiti nadumaduma a paset ti Metro Manila, Cavite, Laguna, Batangas, Rizal, Quezon, Bulacan, Tarlac, Pampanga, Oriental Mindoro, Occidental Mindoro, ken Marinduque.
VP Duterte, saan a dimmar-ay iti umuna nga aldaw ti impeachment trial; Sen Escduero, nabotosan a presiding officer
Ekspektaren ti PAGASA a rummuar ni Bagyo Henry iti pagilian inton agsapa ti Huebes, Hulio 2. (Ellalyn De Vera-Ruiz/Manila Bulletin//Lito Hilidon/Bannawag)
